Ceremonia shtetërore për Ratko Mlladiç, Ditmir Bushati: Serbia nuk mund të konsiderohet faktor stabiliteti pa pranuar përgjegjësitë për luftërat e viteve ’90!

Ish-ministri i Jashtëm, Ditmir Bushati, ka reaguar pas ceremonisë shtetërore për sjelljen në Serbi të trupit të Ratko Mlladiçit, duke e cilësuar atë si një tjetër dëshmi të refuzimit të Beogradit për t’u përballur me të kaluarën dhe përgjegjësitë për luftërat e viteve ’90.

Sipas Bushatit, mënyra se si po trajtohet vdekja e Mlladiçit tregon se në Serbi vijon të jetë e pranishme ideologjia që, sipas tij, justifikon krimet e luftës dhe gjenocidin. Ai ngre gjithashtu pikëpyetje mbi qëndrimin e komunitetit ndërkombëtar ndaj glorifikimit të të dënuarve për krime lufte dhe mohimit apo relativizimit të gjenocidit.

“Ceremonia shtetërore për sjelljen e trupit të vdekur të Ratko Mlladiçit në Serbi, tregon se vdekja e tij nuk po trajtohet si ikja nga jeta e një krimineli lufte të dënuar nga drejtësia ndërkombëtare.

Përkundrazi, vdekja e tij ka nxjerrë në pah edhe njëherë refuzimin e Serbisë për t’u përballur me politikat që çuan në luftërat e viteve ’90, dhe me pasojat e tyre. Në vend që të pranojë përgjegjësitë, Serbia flet për ‘padrejtësi historike ndaj serbëve’.

Është e qartë se kjo qasje politike nuk mori fund me Sllobodan Millosheviçin, e as me vendimet e drejtësisë ndërkombëtare. Serbia nuk mund të ndërtojë një identitet demokratik të qëndrueshëm e as të konsiderohet faktor stabiliteti në rajon pa pranuar përgjegjësië për luftërat e viteve ’90. Ato nuk ishin rezultat i padrejtësive historike, por pasojë e politikave të ndjekura nga Beogradi. Prandaj, demokratizimi dhe europianizimi i Serbisë dhe rajonit kërkon një shkëputje rrënjësore nga ideologjia që justifikon krimet e luftës dhe gjenocidit.

Mlladiç vdiq, ndërsa ideologjia që e shndërroi atë në hero vazhdon të jetojë. Prandaj, pyetja nuk është më se deri ku mund të shkojë mohimi i krimeve të luftës apo glorifikimi i kriminelëve. Pyetja është: Ku është fundi? Dhe një pyetje po aq e rëndësishme duhet t’i drejtohet komunitetit ndërkombëtar: Edhe për sa kohë do të trajtohen glorifikimi i kriminelëve të dënuar të luftës, si dhe mohimi e relativizimi i gjenocidit, thjesht si një tjetër mosmarrëveshje politike në Ballkan?”, thekson Bushati.