Ministrja e Administratës Shtetërore dhe Vetëqeverisjes Lokale e Serbisë, Snezhana Paunoviç, tha më 25 korrik se është “një gënjeshtër e kulluar” pretendimi se për tre vjet e gjysmë ka marrë pagë si drejtoreshë e Institucionit Farmaceutik të Pejës në Kosovë, edhe pse ky institucion ishte mbyllur me vendim të Qeverisë së Serbisë.
Paunoviç reagoi për gazetën ‘Danas’ ndaj artikullit të Radios Evropa e Lirë (REL), që këto të dhëna bazuar në analizimin e dokumenteve publike që i kishte dorëzuar vetë Paunoviç.
Ajo tha se bëhet fjalë për “një të pavërtetë që dikush po e përhap për të më linçuar”.
“A mendoni vërtet se ka dikush në shtetin e Serbisë aq të fuqishëm sa të mund ta mbyllë një institucion me nënshkrimin e tij dhe të vazhdojë të marrë pagë nga buxheti i Serbisë, pa e vënë re këtë i gjithë sistemi? Kjo është në të njëjtin nivel me ‘lajmin’ se Koreja e Veriut e ka fituar Kampionatin Botëror të Futbollit”, tha Paunoviç.
Paunoviç nuk shpjegoi pse në dokumentet publike për të ardhurat dhe pasurinë, të cilat ia kishte dorëzuar Agjencisë për Parandalimin e Korrupsionit në Serbi, kishte deklaruar se merrte pagë si ushtruese e detyrës së drejtoreshës së këtij institucioni deri në vitin 2025, kur u emërua ministre në Qeverinë serbe.
Ministrja, e cila më herët kishte shkaktuar reagime të ashpra në Kosovë dhe në Bashkimin Evropian me deklaratën se po të ishte në krye të shtetit më 1998 do ta “spastronte etnikisht” Kosovës, po ashtu nuk dha shpjegim për dokumentet publike që tregojnë se më 2021, në cilësinë e ushtrueses së detyrës së drejtoreshës së Institucionit Farmaceutik të Pejës, kishte dorëzuar vetë kërkesën për fshirjen e këtij institucioni nga regjistri.
Se Institucioni Farmaceutik i Pejës, me seli në Gorazhdec, nuk ekziston më, për Radion Evropa e Lirë e konfirmoi edhe gazetari i Radios Gorazhdec, Damjan Portiç.
Nga analizimi i raporteve që Paunoviç ia kishte dorëzuar Agjencisë për Parandalimin e Korrupsionit, Radio Evropa e Lirë konstatoi se gjatë 11 vjetëve sa, sipas të dhënave zyrtare, ajo drejtoi Institucionin Farmaceutik të Pejës, nga buxheti i Serbisë ka marrë rreth 146.000 euro pagë.
Duke folur për gazetën Danas, Paunoviç po ashtu pretendoi se “mediat që publikuan informacionin” nuk e kishin kontaktuar para publikimit të artikullit.
Radio Evropa e Lirë i ka dërguar pyetje kabinetit të ministres Paunoviç tri ditë para publikimit të artikullit dhe ka kontaktuar edhe përfaqësuesen e saj për media.
As kabineti i ministres Paunoviç, as Qeveria e Serbisë, Zyra e saj për Kosovën, Fondi Republikan për Sigurim Shëndetësor, si dhe ministritë përgjegjëse për spitalet dhe institucionet farmaceutike shtetërore në Serbi, nuk iu përgjigjën pyetjeve të Radios Evropa e Lirë lidhur me të ardhurat e Paunoviçit dhe funksionin e saj në një institucion që kishte pushuar së ekzistuari.
