Mbretëresha e Spanjës, Letizia, tërhoqi të gjithë vëmendjen me elegancën e saj në një darkë shtetërore në Madrid, ku së bashku me Mbretin Felipe VI pritën Presidentin francez Emmanuel Macron dhe bashkëshorten e tij, Brigitte Macron.
E veshur me një fustan të gjatë blu nga Carolina Herrera, Letizia e kompletoi pamjen me një prej bizhuterive të saj më të preferuara, “Spanish Floral Tiara”, një kurorë historike që i ishte dhuruar ish-mbretëreshës Sofia nga qeveria spanjolle me rastin e martesës së saj në vitin 1962.
Mbretëresha 54-vjeçare e kombinoi fustanin elegant me sandale metalike me platformë nga marka spanjolle Martinelli. Ndërkohë, Mbreti Felipe VI u shfaq me kostum të zi dhe papion të bardhë, teksa priti çiftin presidencial francez në Pallatin Mbretëror të Madridit.
Brigitte Macron zgjodhi një fustan të bardhë elegant, të stilit kolonë, me detaje argjendi anash. Pamjen e saj e plotësoi me një çantë të bardhë me shkëlqim dhe vathë të gjatë.
Për këtë vizitë të rëndësishme diplomatike, Emmanuel Macron mbajti edhe dekoratat që simbolizojnë lidhjet mes Francës dhe Spanjës, përfshirë shenjat e Urdhrit të Isabellës Katolike.
Darkën shtetërore e shoqëroi një menu e veçantë e përgatitur nga shefi i njohur spanjoll Joan Roca, ndërsa gjatë mbrëmjes mbajtën fjalime si Presidenti Macron, ashtu edhe Mbreti Felipe VI.
Macron përmendi në fjalën e tij edhe Princeshën Leonor, vajzën e çiftit mbretëror, e cila së fundmi ka nisur studimet universitare në Madrid.
Vizita e Macronëve shënon vizitën e parë shtetërore të një presidenti francez në Spanjë që prej vitit 2009. Udhëtimi dyditor synon forcimin e marrëdhënieve politike, ekonomike dhe diplomatike mes dy vendeve.
Gjatë ditës, Macron dhe Felipe VI zhvilluan takime mbi marrëdhëniet franko-spanjolle, ndërsa në qendër të diskutimeve ishte edhe Traktati i Miqësisë dhe Bashkëpunimit i nënshkruar nga Macron dhe kryeministri spanjoll Pedro Sánchez në Barcelonë në janar 2023.
