Kampionati Europian i Futbollit për Femra ngre siparin sot në Angli, por nuk do të jetë aty futbollistja më e mirë.

Bëhet fjalë për mesfushoren e njohur të Barcelonës dhe Spanjës, Alexia Putellas, e cila ka pësuar një dëmtim të rëndë dhe ka humbur Europianin.

Lajmin e dha vetë përfaqësuesja spanjolle e femrave, që fillimisht njoftoi për një dëmtim që do ta lërë jashtë Europianit, por shumë shpejt ekzaminimet konfirmuan një mungesë shumë të gjatë të mesfushores 28-vjeçare.

Putellas ka këputur ligamentin e kryqëzuar dhe do të duhet t’I nënshtrohet një operacioni për t’u rikuperuar, ndaj rikthimi në fushë është parashikuar të ndodhë pas të paktën 6 muajsh.

Alexia Putellas është lidere e Barcelonës dhe e përfaqësueses spanjolle, që do të duhet të bëjë pa shërbimet e saj në fushë, në kompeticionin më të rëndësishëm në kontinent.