Kryeministri kanadez, Mark Carney ka mirëpritur qëllimin që Kanadaja të bëhet anëtarja e parë e asociuar e BE-së, duke bërë thirrje për bashkëpunim të thellë midis Evropës dhe vendit të tij për të siguruar sovranitetin e tyre.
Në një fjalim para Parlamentit Europian në Strasburg, Carney tha se sondazhet treguan se shumica dërrmuese e kanadezëve mbështesnin lidhje shumë më të ngushta me Europën.
“Kanadaja dhe Evropa duhet të sigurojnë autonominë tonë strategjike përmes bashkëpunimit të thellë në gamën e plotë të aftësive strategjike”, tha ai, duke renditur sektorë duke përfshirë mineralet kritike, sigurinë energjetike dhe inteligjencën artificiale.
Presidentja e Komisionit Evropian, Ursula von der Leyen, të mërkurën e ftoi Kanadanë të bëhej anëtarja e parë e asociuar e BE-së në një fjalim në të cilin deklaroi se donte ta çonte marrëdhënien dypalëshe “në nivelin më të lartë të mundshëm”. Disa orë më vonë, Trump kërcënoi me “tarifa shumë serioze” për Evropën nëse plani do të zbatohej.
“Kanadaja dhe Evropa janë të forta. Evropa dhe Kanadaja janë më të forta së bashku… Objektivi nuk është vetëmjaftueshmëria, është qëndresa kolektive. Nuk po propozoj një bllok të tretë për t’u bërë rival i fuqisë së madhe, vetëm me sjellje më të mira”, tha kryeministri kanadez, duke shtuar se një aleancë BE-Kanada do të ishte një “fener për demokracitë e tjera”.
Ndërkohë, duke folur për gazetarët, Carney tha se Kanadaja do të vendosë vetë se me kë do të bëjë marrëveshje.
“Askush nuk do të diktojë kulturën tonë ose me kë mund të arrijmë marrëveshje ndërkombëtarisht”, u tha Carney në përgjigje të kritikave të Trump.
Carney tha se Kanadaja mund të jetë gjithashtu një partner më efektiv i SHBA-së përmes një lidhjeje më të ngushtë me BE-në dhe tha se përmbajtja e çdo marrëdhënieje të re do të ishte më e rëndësishme sesa termi që do të përdoret për të.
