Policia e Tiranës ka goditur dy raste të paligjshme të lojërave të fatit, ndërsa ka proceduar edhe dy persona që dyshohen si përgjegjës. Sipas policisë, shtetasit e proceduar janë të dy nga Tirana.
Gjithashtu bëhet me dije se në kuadër të operacionit "Poker", janë sekuestruar në cilësinë e provës materiale një kompjuter, disa tavolina pokeri dhe shumë sende të tjera, të cilat përdoreshin nga shtetasit e proceduar.
Njoftimi i Policisë:
Finalizohet operacioni “Poker”
Goditen dy raste të aktivitetit të kundërligjshëm të lojërave të fatit. Operacioni nga Komisariati i Policisë nr 2. Procedohen penalisht 2 shtetas për veprën penale “Vënia në dispozicion e lokaleve për lojëra të palejuara”.
Sekuestrohet në cilësinë e provës materiale një tavolinë pokeri, kompjuter, monitor, aparate celularë, bizhuteri, çelësa mjetesh dhe vlera monetare.
Shërbimet e Policisë të Komisariatit Nr. 2, në bazë të informacioneve të marra në rrugë operative se në dy lokale të ndryshme zhvillohej në mënyrë të kundërligjshme aktiviteti i lojërave të fatit, organizuan dhe finalizuan operacionin e koduar “Poker”, ku si rezultat u proceduan penalisht shtetasit:
– R. N.,32 vjeç, banues në Tiranë.
– A. S., 55 vjeç, banues në Tiranë.
Gjatë kontrollit të ushtruar në rrugën “Irfan Tomini” dhe në rrugën “Ismail Qemali”, në lokalet nën administrimin e këtyre shtetasve, Policia gjeti dhe sekuestroi në cilësinë e provës materiale një tavolinë pokeri, kompjuter, monitor, aparate celularë, bizhuteri, çelësa mjetesh, si dhe vlera monetare.
Kontrollet kundër aktivitetit të paligjshëm të lojërave të fatit do të vijojnë në gjithë qarkun Tiranë, me qëllim parandalimin, evidentimin dhe ndëshkimin e këtij aktiviteti të kundërligjshëm. Policia e Shtetit fton qytetarët që të denoncojnë në numrin 112 ose përmes aplikacionit “Komisariati Dixhital”, çdo veprimtari të tillë të kundërligjshme.
