Në Samitin Ndërkombëtar të Hapësirës, të zhvilluar dje, më 10 shtator, në Paris, presidentja e Komisionit Evropian, Ursula von der Leyen, prezantoi prioritetet e Bashkimit Evropian për forcimin e sektorit hapësinor dhe rritjen e pavarësisë strategjike të Evropës.
Një nga pikat kryesore ishte forcimi i IRIS², konstelacioni i ardhshëm satelitor i BE-së për komunikime të sigurta. Pasi të vendoset në funksion, sistemi do të mundësojë komunikime të qëndrueshme në të gjithë Europën, duke mbajtur të lidhura qeveritë, shërbimet e emergjencës dhe infrastrukturën kritike, edhe në zonat e largëta dhe në situata krizash.
Sipas Komisionit Evropian, IRIS² do të ndihmojë në forcimin e sovranitetit digjital të Europës dhe në uljen e varësisë nga sistemet satelitore jashtë Evropës.
Interesi për projektin është rritur edhe mes shteteve anëtare, disa prej të cilave kanë premtuar financime shtesë për ta forcuar rolin e IRIS² si një projekt i përbashkët europian.
Një treg hapësinor më konkurrues
Von der Leyen theksoi gjithashtu nevojën për një sektor hapësinor europian më të fuqishëm dhe konkurrues, i cili të jetë në gjendje të rritet dhe të konkurrojë në tregun global.
Për këtë qëllim, BE-ja synon të krijojë një kuadër rregullator të qartë, proporcional dhe transparent përmes EU Space Act, me kërkesa të përbashkëta për sigurinë dhe qëndrueshmërinë e aktiviteteve hapësinore, duke shmangur njëkohësisht barrën e panevojshme për kompanitë evropiane, veçanërisht për ndërmarrjet e vogla dhe startup-et.
Europës i duhet akses i pavarur në hapësirë
Një tjetër prioritet i vendosur në samit ishte forcimi i aksesit të Europës në hapësirë përmes rritjes së investimeve private dhe mbështetjes për zgjidhje të reja dhe inovative për transportin hapësinor.
Në samit, aktorët publikë europianë shprehën gjithashtu mbështetjen për një vizion afatgjatë të përbashkët për transportin hapësinor, me synimin për të përcaktuar një drejtim të përbashkët për mënyrën se si Evropa do të sigurojë aksesin e saj në hapësirë në të ardhmen.
