Nespulla është një pemë shumëvjeçare që rritet edhe në Shqipëri dhe njihet për frutat e saj të verdha ose portokalli, me shije të ëmbël dhe pak të athët.
Ajo përdoret shpesh edhe si pemë dekorative në kopshte dhe oborre.
Frutat dalin në grupe dhe kanë formë të rrumbullakët ose si dardhë e vogël. Brenda tyre ka disa fara të mëdha që nuk hahen.
Pema e nespullës e ka origjinën nga Lindja e Largët, konkretisht nga Japonia, dhe është e njohur me emrin shkencor Eriobotrya japonica.
Një veçori e saj është se lulëzon në vjeshtë, ndërsa frutat piqen në pranverë.
Në Shqipëri njihet me emra të ndryshëm, si nespullë apo muçmollë, dhe në disa zona quhet edhe “muçmolla e verës”.
Në treg shfaqet zakonisht nga fundi i pranverës, ndërsa këtë vit është vërejtur dalja më herët e frutave dhe me çmime më të larta, për shkak të kushteve të motit.
Nespulla është e pasur me ujë, fibra, vitamina A, B dhe C, si edhe minerale të ndryshme si kalium, kalcium dhe hekur. Përmban gjithashtu pektinë, që ndihmon tretjen dhe funksionimin e zorrëve.
Në mjekësinë popullore, gjethet e saj përdoren në formë çaji për qetësim dhe për probleme të lehta të frymëmarrjes apo lëkurës. Fruti ndihmon në hidratim, në rregullimin e tretjes dhe në largimin e lëngjeve të tepërta nga trupi.
Megjithatë, farat e nespullës nuk duhen konsumuar, pasi përmbajnë substanca që mund të jenë të dëmshme dhe të shkaktojnë shqetësime si të vjella apo marramendje, sidomos te fëmijët.
