Kreu i agjencisë së refugjatëve të Kombeve të Bashkuara, Filippo Grandi ka akuzuar Moskën për shkeljen e parimeve themelore të mbrojtjes së fëmijëve duke u dhënë pasaporta ruse fëmijëve refugjatë të pashoqëruar.
Ai tha se UNHCR-ja do të përpiqet të ketë akses tek të prekurit dhe të përpiqet të gjejë zgjidhje në interesin e tyre më të mirë. Megjithatë, Grandi pranoi se nuk e dinte se sa fëmijë ishin prekur.
“Në situatën e luftës, ju nuk mund të përcaktoni nëse fëmijët kanë familje apo kujdestari. Prandaj, derisa kjo të sqarohet, nuk mund t’u jepni atyre një kombësi tjetër ose t’i birësoni nga një familje tjetër,” tha Grandi.
Komentet e Grandit vijnë pasi zyrtari më i lartë i të drejtave të Kombeve të Bashkuara shprehu shqetësimin në muajin Korrik se fëmijët ukrainas ishin marrë nga jetimoret në rajonin lindor të Donbasit dhe ishin “deportuar me forcë” në Rusi. Kishte gjithashtu shqetësime se Moska po modifikonte legjislacionin ekzistues për të përshpejtuar këtë proces.
Sipas të dhënave më të fundit të UNHCR-së, rreth 3 milionë refugjatë nga Ukraina janë regjistruar në Rusi, më shumë se në çdo vend tjetër evropian. Është e paqartë se sa prej tyre janë fëmijë.
Një këshilltar presidencial ukrainas tha në fillim të këtij muaji pothuajse 14,000 fëmijë ishin “deportuar” në Rusi nga pjesët e pushtuara të Ukrainës dhe e akuzoi atë për rrëmbimin e tyre. Kremlini i ka mohuar akuzat.
