SHBA shton presionin ndaj Vuçiçit/ Projektligj dypartiak në Kongres: Luftoni korrupsionin dhe shkëputuni nga Rusia, Kina e Irani, ose rrezikoni sanksione

Ligjvënësit amerikanë kanë rritur presionin ndaj Presidentit serb, Aleksandër Vuçiç teksa zgjedhjet po afrohen në Serbi, duke e paralajmëruar se nëse nuk shkëputet nga orbita ruse, kineze dhe iraniane, do të përballet me sanksione.

Përfaqësuesit Joe Wilson dhe Bill Keating, anëtarë të Komitetit të Punëve të Jashtme të Dhomës së Përfaqësuesve, prezantuan të enjten legjislacionin që kërkon sanksione dhe ndalime vizash për individët që minojnë proceset demokratike, paqen, stabilitetin dhe integritetin territorial në Ballkanin Perëndimor.

Lëvizja e ligjvënësve vjen pas protestave masive të studentëve kundër korrupsionit në Serbi, të cilat e kanë munduar Vuçiçin për dy vjet.

“Nën Presidentin Vuçiç, Serbia është larguar qëllimisht nga sundimi i ligjit dhe është afruar më shumë me armiqtë e lirisë si krimineli i luftës Putin, Partia Komuniste Kineze dhe regjimi terrorist në Teheran”, tha Wilson në një deklaratë për The Hill, duke iu referuar Presidentit rus Vladimir Putin.

“Pavarësisht protestave të përhapura kundër korrupsionit, qeveria e Vuçiçit kërcënon të destabilizojë rajonin dhe më gjerë. Populli i Serbisë meriton më mirë”, shtoi republikani nga Karolina e Jugut.

Keating vuri në dukje gjithashtu se legjislacioni e bën të qartë se Vuçiç dhe zyrtarë të tjerë të qeverisë serbe duhet të bëjnë përparim në përpjekjet kundër korrupsionit dhe të luftojnë ndikimin nga Irani, Rusia dhe Kina.

“Demokracia, sundimi i ligjit dhe antikorrupsioni duhet të mbeten shtyllat kryesore në marrëdhëniet dypalëshe SHBA-Serbi”, tha ai.

Ata kritikojnë Vuçiçin për përdorim të forcës së tepërt kundër protestuesve, kërkon një hetim dhe llogaridhënie për tragjedinë hekurudhore dhe ngrenë shqetësime për lidhjet në thellim të Serbisë me Iranin, Rusinë dhe Kinën.

“Shtetet e Bashkuara kanë një interes të qëndrueshëm për një Serbi të qëndrueshme, demokratike dhe sovrane, e cila është e përkushtuar ndaj paqes dhe sigurisë rajonale, e ankoruar fort në institucionet euroatlantike dhe e lirë nga ndikimi i jashtëm keqdashës”, thuhet në tekstin e projektligjit.