Tajvani ka zhvilluar një stërvitje të gjerë përgatitore në pjesën qendrore të ishullit, duke simuluar skenarë ekstremë si një bllokadë kineze, një tërmet i fuqishëm i shfrytëzuar nga Pekini për të mbjellë kaos, sulme kibernetike, sabotim të infrastrukturës, ndërprerje të transmetimeve televizive, trazira sociale dhe një pushtim në shkallë të plotë.

Stërvitja, e prezantuar para më shumë se 370 zyrtarëve qeveritarë dhe ushtarakë, është pjesë e strategjisë së presidentit Lai Ching-te për të rritur gatishmërinë e vendit, ndërsa presioni ushtarak nga Kina vijon të shtohet.

Simulimi i parë testoi aftësinë e autoriteteve lokale në qarkun Nantou për të ruajtur funksionimin e institucioneve në rast sulmi, në koordinim me qeverinë qendrore dhe forcat e armatosura.

Ministri pa portofol Chi Lien-cheng, i cili mbikëqyri stërvitjen dyditore, deklaroi se kërcënimi është i afërt.

“Armiku ynë është pikërisht në pragun tonë, matanë Ngushticës së Tajvanit. Është shumë afër.”

Ai theksoi se, megjithëse ka ende mangësi në burime dhe organizim, ushtrime të tilla janë thelbësore për të testuar gatishmërinë e institucioneve.

Kina nuk e ka përjashtuar kurrë përdorimin e forcës për ta vendosur Tajvanin nën kontrollin e saj, ndërsa qeveria tajvaneze këmbëngul se vetëm populli i ishullit mund të vendosë për të ardhmen e tij.

Ndërkohë, gjatë zhvillimit të stërvitjes, Tajvani raportoi një tjetër patrullë ushtarake kineze rreth ishullit, me anije luftarake dhe të paktën 22 avionë ushtarakë, përfshirë bombardues H-6 me kapacitet bërthamor.

Nga ana tjetër, Zyra Kineze për Çështjet e Tajvanit akuzoi presidentin Lai Ching-te se po përshkallëzon tensionet në rajon, duke e cilësuar atë si “nxitës lufte” dhe “shkatërrues të paqes”.

Stërvitja përfshiu edhe simulime të sulmeve me dronë ndaj termocentraleve, ngritjen e qendrave të shpërndarjes së ushqimit, si dhe reagimin ndaj një tërmeti me magnitudë 6.8, që në skenar shkaktonte 12 viktima dhe dëme të mëdha në infrastrukturë.

Autoritetet testuan gjithashtu koordinimin mes institucioneve civile dhe ushtrisë, duke përdorur sisteme të avancuara hartografie dhe komunikimi për monitorimin në kohë reale të situatës.