Dy persona kanë humbur jetën dhe një fëmijë ka mbetur i plagosur lehtë pas një sulmi me armë zjarri në një bibliotekë në Kaliforninë Veriore. Autori i dyshuar është arrestuar nga policia.
Sipas autoriteteve lokale, ngjarja ndodhi rreth orës 17:00 me orën lokale në Bibliotekën e Qarkut Butte, në qytetin Chico. Shefi i Policisë së Chico-s, Billy Aldridge, deklaroi gjatë një konference për shtyp se policia mori njoftime për të shtëna me armë dhe britma nga brenda bibliotekës.
Pas hyrjes në objekt, autori i dyshuar u largua nga dera e pasme e bibliotekës, por u arrestua menjëherë nga oficerët që ndodheshin në pjesën e pasme të godinës.
“Ky incident është jashtëzakonisht i trishtueshëm dhe traumatik për shumë njerëz në komunitetin tonë”, tha Aldridge.
Autoritetet konfirmuan se dy persona humbën jetën, ndërsa një fëmijë u transportua në spital me lëndime të lehta. Deri më tani nuk janë bërë publike identitetet e viktimave, pasi autoritetet po presin të njoftojnë familjarët e tyre.
Po ashtu, nuk janë dhënë ende detaje mbi identitetin e autorit apo motivin e sulmit, megjithëse hetuesit besojnë se ai ka vepruar i vetëm.
Qarku Butte u ka bërë thirrje qytetarëve të shmangin zonën, ndërsa njoftoi se të gjitha degët e bibliotekës do të qëndrojnë të mbyllura deri në një njoftim të ri.
