Një 28-vjeçar është arrestuar nga policia në Kapshticë, pasi ka tentuar të korruptojë me 20 euro një punonjës policie.
Mësohet se shtetasi J. X., 28-vjeç nga Elbasani gjatë procedurave rutinë në kalimin e kufirit, si dhënia e pasaportës dhe dokumenteve përkatëse, ka vendosur brenda tyre dhe një kartëmonedhë 20 euroshe, me qëllim shmangien e kontrolleve të detajuara, pasi raportohet se ai kishte kaluar kufirin në mënyrë të paligjshëm.
Ndërkohë policia e ka shoqëruar 28-vjeçarin për veprime të mëtejshme.
Njoftimi i policisë:
Kapshticë
Vijojnë kontrollet e detajuara për goditjen e paligjshmërisë.
Goditet një rast i korrupsionit aktiv të personave që ushtrojnë funksione publike.
Punonjësit e Policisë Kufitare në Pikën e Kalimit Kufitar Kapshticë, gjatë kryerjes së proceduarave të regjistrimit të shtetasve që kalojnë kufirin, kanë goditur një rast të korrupsionit. Shtetasi J. X., 28 vjeç, banues në Elbasan, gjatë kryerjes së procedurave të regjistrimit në hyrje të Republikës së Shqipërisë, në momentin kur punonjësi i Policisë i ka kërkuar pasaportën, ai ia ka dhënë atë, me një kartëmonedhë të prerjes 20 euro në brendësi të saj, me qëllim përshpejtimin dhe shmangien e procedurave të kontrollit të dokumentacionit për kalimin drejt tokës shqiptare, pasi kishte kaluar kufirin në mënyrë të paligjshme nëpërmjet kufirit të gjelbër.
Specialistët për Hetimin e Krimit Financiar-Ekonomik pranë Drejtorisë Vendore të Policisë Korçë kanë shoqëruar shtetasin J. X., 28 vjeç, banues në Elbasan, për veprime të mëtejshme.
