Nga Juve, tek Interi. Beppe Marotta mund të ketë gjetur ekipin e tij të ri pas lamtumirës nga bardhezinjtë. Sipas mediave italiane, të hënën ka patur një takim mes ish-drejtuesit bardhezi dhe Steven Zhang.
Mësohet se i riu kinez, që me shumë mundësi do të jetë edhe presidenti i ardhshëm i zikaltërve, ishte shumë entuziast pas takimit kokë më kokë me Marottan, e dëshiron të arrijë sa më shpejt marrëveshjen.61-vjeçari do të bëhej menjëherë pjesë e stafit të klubit milanez, duke zënë vendin e lënë bosh nga Walter Sabatini.
Ndërkohë, Zhang dëshiron të mbyllë marrëveshjen këto ditë, sepse për Marottan janë interesuar edhe skuadra të tjera, duke përfshirë këtu kushërinjtë e Milanit. Në deklaratat e tij, ish-drejtori i Juventusit ka thënë se dëshiron të punojë sërish me një ekip e për momentin nuk ka interes të punojë me federatën italiane ose ndonjë organizatë tjetër.
Tani duhet pritur që raporti i punës me Juven të mbyllet. Më 25 tetor ai nuk do të jetë më administrator i deleguar i klubit, ndërkohë që duhet të gjendet një marrëveshje për pozicionin e drejtorit përgjithshëm, të cilin e mban po 61-vjeçari, por është me afat të pacaktuar. Pas zgjidhjes së kontratës, që pritet të ndodhë së shpejti, Beppe Marotta mund të nisë një aventurë të re, në krah të Antonellos e Ausilios.
