Ish-deputeti Astrit Patozi, ditën e djeshme bëri me dije se do të kandidonte për kryetar të PD-së, pas humbjes që kjo parti pati në zgjedhjet e 25 qershorit.
Pas shpalljes së kandidaturës, Patozi ka reaguar në profilin e tij në ‘Facebook’, ku ka dhënë një mesazh për të gjithë demokratët.
Ai shprehet se e vetmja shtysë që ka pasur për të garuar për kreun e PD-së ka qenë ringritja e kësaj partie, ndërsa bëri thirrje që te ketë një garë të ndershme.
Statusi i Patozit
ASKËND PËR TË HUMBUR, GJITHËKËND PËR TË FITUAR
Të nderuar miq,
Gjatë këtyre ditëve, e sidomos sot, kam marrë shumë mesazhe mbështetjeje.
Në pamundësi për t'ju kthyer të gjithëve përgjigje, ju falenderoj nga zemra për inkurajimin.
Më vjen mirë që e mendoni si unë nevojën e madhe për ringritjen e Partisë Demokratike.
Është e vetmja shtysë që më frymëzon mua dhe shumë kolegë të tjerë, të cilëve u jam shumë mirënjohës, në këtë përpjekje. Kam vetëm një thirrje për ju të gjithë:
Ky është një konkurrim brenda nesh, që ka vetëm një synim, garën e ndershme dhe bashkimin e Partisë Demokratike. NUK KEMI ASKËND PER TË HUMBUR, DHE DUHET TË MARRIM GJITHËKËND PËR TË FITUAR.
Me shumë respekt dhe konsideratë ASTRIT PATOZI
