Ish-kryetari i Bashkisë së Krujës, Shkëlzen Hoxha, është dërguar për gjykim nga Prokuroria e këtij qyteti pasi akuzohet se ka vjedhur duke shpërdoruar detyrën një vlerë prej 8 milionë lekësh.

Me të njëjtën akuzë, Prokuroria ngarkon edhe administratorin e kompanisë “Regli” shpk, Njazi Prençi. Së bashku me ta, Prokuroria e Krujës akuzon për veprat penale të “falsifikimit të dokumenteve” dhe “shpërdorimit të detyrës” edhe ish-zyrtarët e Bashkisë Krujë, Xhuma Roshi, Indrit Fida dhe Spartak Shehu. Ndërkohë që është vendosur sekuestro preventive mbi të gjithë asetet e kompanisë “Regli”.
 
Sipas prokurorisë, të gjithë këta persona akuzohen se kanë abuzuar me fondin e emergjencës, i cili u është akorduar për “Sistemimin e përroit, lagjja nr. 1, Ura e Madhe-Krujë, me vlerë 20.520.000 lekë me Tvsh”. Prokuroria ka nisur hetimin në bazë të një kallëzimi të Bashkisë Krujë, të dorëzuar në fund të vitit 2015. Nga hetimi ka rezultuar se, vlera në terren e investimit në këtë projekt është shumë më e vogël, duke arritur në konkluzionin se Hoxha dhe administratori i kompanisë që fitoi procedurën e prokurimit, kanë vjedhur mbi 8 milionë lekë të rinj.
 
Bashkia Krujë ka konstatuar problematikën në terren, pas ankesave të qytetarëve të ndryshëm. Sipas shqetësimit publik, në dimrin e vitit 2014, zona Ura e Madhe-Krujë u përmbyt nga shirat e shumtë. Në pranverën e vitit 2015, pak para zgjedhjeve lokale, Bashkisë Krujë iu akordua fond emergjence nga ana e Ministrisë së Brendshme për sistemimin e përroit, me qëllim shmangien e përmbytjeve në vijim. Por, edhe pas sistemimit, situata e përmbytjeve nuk ishte shmangur dhe kjo u evidentua në dimrin e vitit 2015, kur zona u përmbyt sërish.
 
Në këto kushte, Bashkia Krujë dorëzoi kallëzimin në Prokurori, e cila zhvilloi hetimet. Në bazë të veprimeve proceduriale rezultoi se, ish-kryetari i Bashkisë, Shkëlzen Hoxha, në mars 2015 ka njoftuar 5 firma për të marrë pjesë në procedurën e prokurimit për sistemimin e përroit. Nga shqyrtimi i procedurave, rezultoi se 2 prej 5 kompanive të ftuara, nuk i ishte bërë i ditur afati i dorëzimit të dokumentacionit. Këto dy kompani nuk morën pjesë në tender, për shkak të mungesës së dijenisë për datën. Ndërkohë, nga 3 kompanitë e tjera, u shpall fituese “Regli” shpk”.

Projekti, i cili sipas dokumentacionit të nënshkruar nga ish-kryebashkiaku, ishte përfunduar brenda parametrave, rezultoi më pas nga hetimi i Prokurorisë se kishte mangësi të theksuara, shmangie nga projekti fillestar dhe ulje të ndjeshme të kostove të parashikuara.