Kryetari i Kuvendit z.Ilir Meta u prit sot në Kopenhagen nga Kryetari i Parlamentit të Danimarkës z.Mogens Lykketoft dhe Presidiumi i Parlamentit. Gjatë takimit Kryetari i Parlamentit të Danimarkës z. Mogens Lykketoft, pasi i uroi mirëseardhjen z. Meta dhe delegacionit shqiptar në Kopenhagen, shprehu miqësinë dhe mbështetjen e Danimarkës për procesin e zhvillimit social, ekonomik dhe për integrimin evropian të Shqipërisë. Z. Lykketoft shprehu bindjen se avancimi i axhendës evropiane të Shqipërisë do t'a inkurajojë dhe përshpejtojë procesin e reformave dhe progresit në Shqipëri dhe në rajon.
Kryetari i Kuvendit z.Ilir Meta shprehu mirënjohjen për mbështetjen në vite të Danimarkës jo vetëm për perspektivën evropiane të Shqipërisë, por edhe për projektet daneze në vend dhe për asistencën e veçantë që Danimarka i ka dhënë që në fillim Avokatit të Popullit. Z. Meta dhe z. Lykketoft ndan bindjen e përbashkët se marrëdhëniet ndërparlamentare mes Shqipërisë dhe Danimarkës do të hyjnë në një fazë me dinamikë të shkëmbimeve reciproke. Në këtë kuadër, z. Meta shprehu kënaqësinë për krijimin e Grupit të Miqësisë Shqipëri-Danimarkë në Kuvendin e Shqipërisë, i cili do të drejtohet nga deputetja znj. Olta Xhaçka.
Z. Meta e njohu homologun danez mbi axhendën ambicioze të reformave që janë ndërmarrë në Shqipëri në funksion të forcimit të institucioneve dhe rimëkëmbjes ekonomike të vendit dhe theksoi se investitorët danez janë të mirëpritur në Shqipëri kryesisht në fushat e energjisë, agro-përpunimit, bujqësisë dhe turizmit.
Dy homologët biseduan gjithashtu edhe mbi zhvillimet ne rajon ku u vlerësua roli konstruktiv i Shqipërisë dhe u theksua rëndësia e perspektivës evropiane të të gjithëve vendeve të rajonit të Ballkanit në interes të stabilitetit dhe zhvillimit ekonomik. Z. Meta në këtë drejtim bëri një vlerësim të veçantë për kontributin pozitiv që Danimarka ka dhënë në rajon dhe në mënyrë të veçantë në Kosovë.
Në përfundim, Kryetari i Kuvendit Meta vuri në dukje se pavarësisht vendimit në dhjetor, Qeveria shqiptare është e vendosur në avancimin e reformave qe kërkon vendi dhe Kuvendi po adreson të gjitha prioritetet e Komisionit Evropian. Gjatë qëndrimit në Kopenhagen Delegacioni Parlamentar shqiptar kryesuar nga Kryetari i Kuvendit z. Ilir Meta u përshëndet zyrtarisht nga deputetët danez gjatë seancës plenare në Parlamentin e Danimarkës.
Meta shoqërohej nga një delegacion parlamentar i përbërë nga z. Gramoz Ruci, z. Shpëtim Idrizi, z.Agron Duka, znj.Olta Xhaçka, z. Musa Ulqini, Ambasadori i Shqipërisë në Danimarke z.Arben Cici.
/agjencia e lajmeve "Dyrrah"/
