Është si hije e Gentës. Kudo që është këngëtarja, është edhe moderatori Granit Miftari, djali nga Gjilani, i cili nuk është i panjohur për publikun. Por i pakuptueshëm për publikun mbetet raporti që ai ka me Gentën. Duke qenë se shihen gjithmonë bashkë, shpesh janë hedhur dyshime rreth një lidhjeje të mundshme dashurie mes tyre.
“Me Gentën njihemi prej 9 vitesh. Jemi njohur për herë të parë te disa të afërm dhe nga aty filluam të shoqërohemi”, ka treguar fillimisht Graniti, duke sqaruar se miqësia e tyre është forcuar dhe ka filluar të marrë këtë formë që ka sot, nga xhirimet e këngës së Gentës “Skllav më ti s’do të jesh”. “Kanë kaluar shumë e shumë vjet. Miqësia ende ruhet për arsye të respektit reciprok, ndjenjës njerëzore, pozitivitetit, sinqeritetit dhe dashurisë. Po, është e vërtetë se ne jemi më shumë se miq. Jemi si anëtarë të një familjeje e jo vetëm miq. Madje raporti ynë sa vjen e forcohet”, ka shtuar ai duke mos mohuar se kanë një lidhje më shumë se miqësore.
Ndërsa Graniti vazhdon të flasë për shoqen e tij të zemrës, ai njëherësh arsyeton keqkuptimet, siç i quan ai, të shumta të njerëzve rreth raportit të tyre.
“Përderisa Genta është një ndër personat më me famë në trojet shqiptare, ka gati 500.000 fansa në ‘Facebook’ dhe arrin ta mbajë majën e suksesit që sa vjet, është normale që të ketë keqkuptime. Në momentin që vendos të jesh fytyrë publike, gjithçka mund të thuhet dhe flitet për ty”, ka përfunduar rrëfimin ai, duke mbrojtur fuqishëm miken e tij të zemrës.
