21 shtator 2015 – Partia Demokratike ka denoncuar sot në media fakte të reja që sipas saj provojnë mashtrimin kriminal të Saimir Tahirit, në lidhje me makinën e drogës 'AA003GB'.

Sipas disa dokumenteve të sistemit TIMS të siguruara nga PD-ja (shih më poshtë), Tahiri nuk e ka shitur makinën e tij në nëntor të vitit 2013 siç ka deklaruar, pasi ministri është parë një vit më vonë duke ngarë vetë makinën në tri raste, ku i fundit është në pikën kufitare të Kapshticës më 30 gusht të 2014-s.

“Për të fshehur përfshirjen e tij të drejtpërdrejtë në krim, në trafikun e drogës që bëhej me makinën e tij private nga kushërinjtë Habilaj, Tahiri tha se e kishte shitur mjetin në nëntor të vitit 2013. E kishte shitur por nuk e kishte deklaruar, pra ministri kapet në informalitet.

Por ja si është e vërteta.

Me 30 gusht të vitit 2014, një vit pasi ai deklaron se e paska shitur makinën, Saimir Tahiri shfaqet në timon në pikën kufitare të Kapshticës pikërisht me audin AA003GB.

Më herët, me 16 gusht po të vitit 2014, Saimir Tahiri dhe e famshmja AA003GB, shfaqen në pikën kufitare të Qafë Botës.

Dhe me 29 gusht të vitit 2014, sërish në Kapshticë, Saimir Tahiri me audin e tij AA003GB.

Ja pra këto janë faktet. Saimir Tahiri nuk e ka shitur makinën. Ajo është prona e tij, dhe me të zhvillohet linja e trafikut të drogës, AA003GB”, deklaron kreu i Departamentit për Sigurinë e Rendin Publik, Enkeleid Alibeaj.

Më tej, Alibeaj theksoi se edhe varianti i Tahirit për t’i ikur krimit të drogës, me shitjen e makinës por mosdeklarimin e saj, për shkak të vendimit gjyqësor ndaj tij, është një shkelje e rëndë.

“Saimir Tahiri po krijon alibi e gënjeshtra pa fund për këtë histori. Por ngado që rrotullohet ai është në krim.

Tjetërsimi i këtij sendi me vullnet (pra shitja e makinës) nga debitori, edhe pse është në dijeni të faktit se ajo është bllokuar për efekt të përmbushjes së detyrimit gjyqësor, përbën vepër penale të parashikuar në nenin 320 të Kodit Penal.

Konkretisht, dispozita penale parashikon si më poshtë:

Neni 320: Pengime për ekzekutimin e vendimeve të gjykatës

'Fshehja, tjetërsimi, konsumimi, dëmtimi apo shkatërrimi i sendeve për të cilat është marrë një vendim prej gjykatës, ose kryerja e veprimeve të tjera të bëra me qëllim që të mos ekzekutohet ose të pengohet ekzekutimi i vendimit gjyqësor, përbën kundërvajtje penale dhe dënohet me gjobë ose me burgim deri në dy vjet'.

Qartësisht shitja e makinës është një veprim i bërë për të penguar ekzekutimin e vendimit gjyqësor të formës së prerë. Pra për të penguar drejtësinë.

Si rregull, qoftë edhe vetëm pas këtij deklarimi publik, Prokuroria duhet të kishte nisur menjëherë marrjen nën përgjegjësi penale të Ministrit të Brendshëm, për konsumimin e veprës penale të parashikuar nga neni 320 i Kodit Penal. Në këtë rast, nuk ka as nevojë për hetime të thelluara, duke qenë se deklarimi është bërë nga vetë Ministri i Brendshëm, i cili është vetinkriminuar.”

Në përfundim, Alibeaj theksoi dhe njëherë kërkesën e demokratëve për dorëheqjen e Tahirit dhe hetimin e tij deri në fund.

/S.L. portali DurresLajm/