17 korrik 2015 – UEFA nuk do të apelojë vendimin e Gjykatës së Arbitrazhit Sportiv, që i dha Shqipërisë fitoren pas skandalit të dhunës dhe racizimit në Serbi. Konfirmimi ka ardhur nga zyra e shtypit të konfederatës europiane të futbollit.
Pyetjes nëse po mendon të apelojë vendimin e CAS të Lozanës për ndeshjen e 14 tetorit 2014, Serbi-Shqipëri, UEFA iu përgjigj:
“I nderuar zotëri. Vendimi i dhënë nuk apelohet. Përshëndetje të përzemërta. UEFA, Media dhe Marrëdhënie me Publikun”.
Me këto pak fjali, institucioni i drejtuar nga Michel Platini pranon verdiktin e CAS-it dhe dorëzohet përpara Shqipërisë, që festoi fitoren në tavolinë. Një qëndrim që i jep fund të gjitha spekulimeve. Përgjigja zyrtare shërben edhe si përgjigje për autoritetet në Beograd. Në korrespondencën e mëparshme, UEFA sqaroi edhe ndryshimet çoroditëse në renditjen e Grupit I të Euro 2016.
“Bëhej fjalë thjesht për një problem teknik, klasifikimi është korrigjuar”, citohej në reagimin e zyrave të Nionit, duke nisur edhe linkun, ku Shqipëria e sheh veten në vendin e tretë, me pikë të barabarta me Danimarkën, por e penalizuar nga barazimi 1-1 në Elbasan. Ndërsa Serbia është e fundit, me -2 pikë.
/agjencia e lajmeve "Dyrrah"/
