Kreu i Partisë Demokratike, Lulzim Basha, ka reaguar në lidhje me deklaratat e kryeministrit Edi Rama në fjalimin e tij përmbyllës të mandatit të dytë qeverisës.
Nëpërmjet një postimi në rrjetet sociale, Basha shkruan se asgjë e mirë nuk mund të vijë nga një e keqe e vjetër që e ka bërë Shqipërinë të pajetueshme për fëmijët.
Sipas kreut të PD-së, bilanci real i kësaj qeverie është korrupsion, krim, varfëria dhe largimi i shqiptarëve nga vendi.
Basha shton se Partia Demokratike është e angazhuar për të sjellë ato zgjidhje që masakra e 25 prillit u mohoi qytetarëve.
Postimi i Bashës:
Asgjë e re nga përsëritja e mashtrimeve të vjetra. Plehrat digjen në kriza mjedisore të stisura për të çuar taksat e qytetarëve te mafia e inceneratorëve, krimi gëlon prej ortakërisë me pushtetin, korrupsioni që ka kapur shtetin është i përhapur në cdo qelizë të qeverisë
Ky është bilanci real i një regjimi që masakron zgjedhjet vetëm për të vjedhur familjet shqiptare. Autorët e tij duhet të ishin përpara drejtësisë për atë që u kanë bërë Shqipërisë dhe shqiptarëve në këto 8 vite, jo duke përrallosur për arritje imagjinare.
PD e Shqiperise është e angazhuar për të sjellë ato zgjidhje që masakra e 25 prillit u mohoi qytetarëve, sepse asgjë e mirë nuk mund të vijë nga një e keqe e vjetër që e ka bërë Shqipërinë të pajetueshme për fëmijët tanë.
