Gjatë konferencës së përbashkët me kryeministrin Edi Rama, ministrja e Shëndetësisë, Ogerta Manastirliu tha sot se ka indicie të qarta se në Shqipëri mund të kenë hyrë variantet e reja të Covid.
Manastirliu tha se rritja e numrit të rasteve të reja lidhet me qarkullimin e varianteve të reja në vend. Sipas saj, se ngarkesa në spitale ende nuk është në limite, por shtoi se është ulur mosha mesatare e atyre që infektohen.
“Vërehet se në javët e fundit ka një trend të lartë të rasteve të konfirmuara me Covid 19. Rritja e rasteve mund të lidhet edhe me variantet e reja të Covid. Sinjalet kanë ardhur nga laboratorët tanë për variante të reja. Spitalet janë të zëna në masën 70%, pra kemi kapacitete, nuk janë të mbingarkuara. Esencial mbetet zbatimi i masave. Javët e para të këtij viti kemi një incidencë të shtuar dhe lidhet me grupmoshat e të rinjve”, tha Manastirliu.
