Një i paraburgosur ka ndërruar jetë në spital për shkak të dëmtimeve që ka pësuar nga zjarri i rënë mbrëmjen e sotme në Komisariatin e Policisë së Kamzës.
Policia bën me dije se ka ndërruar jetë shtetasi A. M. i cili u dërgua në spital pasi pësoi dëmtime për shkak të flakëve.
Ndërkohë kanë mbetur të lënduar edhe dy persona të tjerë; i paraburgosuri tjetër me iniciale D. I., dhe punonjësi i policisë H. B të cilët po marrin ndihmë mjekësore.
Njoftimi i policisë
Më datë 26.03.2022, në Kamzë, në ambientet e Komisariatit të Policisë Nr. 5, në rrethana ende të paqarta, ka rënë zjarr dhe si pasojë janë dëmtuar dhe janë dërguar në spital për ndihmë mjekësore shtetasit e ndaluar A. M., D. I., dhe punonjësi i policisë H. B.
Shtetasi A. M., ka ndërruar jetë në spital.
Me ndërhyrjen e zjarrfikëseve dhe të punonjësve të Policisë të Komisariatit Nr. 5, zjarri u shua.
Grupi hetimor ndodhet në vendngjarje dhe po punon për sqarimin e rrethanave të ngjarjes.
