Fituesit e Eurovision 2022, Kalush Orchestra, vendosën të organizojnë një ankand për të shitur çmimin që kishin marrë dhe për t’i dhuruar paratë në një fond bamirësie në ndihmë të ushtrisë dhe Ukrainës.
Kjo u njoftua gjatë një konference në Zoom nga udhëheqësi i grupit Oleh Psiuk, raporton Ukrinform.
“Ne planifikojmë ta nxjerrim statujën tonë në ankand dhe t’i dhurojmë të gjitha paratë për një fond bamirësie që ndihmon Forcat e Armatosura dhe Ukrainën. Ne ende nuk e kemi zgjedhur një. Shumë njerëz tashmë po dhurojnë nga jashtë dhe ndoshta shumë të tjerë do të dëshironin të dhuronin. Dhe kjo, sipas mendimit tonë, do të jetë gjëja që i motivon ata. Mendojmë se do të jetë e dobishme për Ukrainën”, tha Psiuk.
Në lidhje me zgjedhjen e platformës së ankandit dhe shumën që grupi kërkon të mbledhë, Psiuk tha se do të vendosen sa më shpejt.
“Do të doja të shihja një shumë të madhe, por nuk dua të përmend ndonjë shifër. Do të shohim,” shtoi lideri i grupit.
Gjatë konferencës, Kalush Orchestra i falënderoi të gjithë për mbështetjen që ndjeu ekipi i tyre, si midis konkurrentëve, ashtu edhe gjatë televotimit.
