Në momentet para se të ekzekutohej, një burrë nga Florida i kërkoi falje familjes së viktimës që kishte vrarë.
Darryl B. Barwick u burgos, pasi hyri në apartamentin e Rebecca Wendt në Panama City dhe e goditi për vdekje me thikë më 31 mars 1986. Ai e kishte parë 24-vjeçaren duke bërë banjë dielli jashtë dhe më pas e kishte ndjekur në dhomën e saj.
Barwick tha se ai synonte të grabiste Wendt, por më pas e vrau ndërsa ajo rezistoi, duke e goditur me thikë 37 herë, ndërsa ajo u përpoq ta luftonte. Ishte një krim i kryer disa muaj pasi ai doli nga burgu për një përdhunim.
Barwick, 56 vjeç, u shpall i vdekur në orën 18:14 të mërkurën pas një injeksioni vdekjeprurës në burgun shtetëror të Floridës. Gjykata e Lartë e SHBA-së hodhi poshtë ankesën përfundimtare për pezullimin e ekzekutimit më herët gjatë ditës.
Pasi u çua në dhomën e vdekjes, Barwick tha: “Nuk mund të shpjegoj pse bëra atë që bëra. Është koha për t’i kërkuar falje familjes… Më vjen keq.“
Më pas ai pretendoi se shteti duhet të tregojë më shumë dhembshuri dhe mirësi për njerëzit, duke kritikuar dënimin e adoleshentëve me burgim të përjetshëm nga Florida.
Barwick mori qetësuesin në orën 18:02 dhe mbylli sytë disa minuta më vonë. Gardiani kontrolloi sytë e Barwick, tundi shpatullat dhe bërtiti emrin e tij për t’u siguruar që ai ishte pa ndjenja, përpara se të vazhdonte ekzekutimi.
Barwick më herët ishte dënuar për vrasje të shkallës së parë, vjedhje me armë, tentativë seksuale dhe grabitje të armatosur në nëntor 1986 dhe në fund u dënua me vdekje.
Gjykata e Lartë e Floridës e hodhi poshtë dënimin me vdekje në vitin 1989, por në një rigjykim në vitin 1992 juria vendosi njëzëri vdekjen.
