Presidenti i Republikës, me propozim të Kryeministrit, dekretoi lirimet dhe emërimet e disa ambasadorëve.
Dekreti shkarkon ambasadorin tonë në Malin e Zi, Ridi Kurtezi.
Në vend të tij është emëruar Zhaklina Peto.
Ridi Kurtezi është emëruar Ambasador i Jashtëzakonshëm dhe Fuqiplotë i Republikës së Shqipërisë në Emiratet e Bashkuara Arabe, rezident.
Gjithashtu është shkarkuar Artur Kuko nga detyra e Ambasadorit të Jashtëzakonshëm dhe Fuqiplotë të Republikës së Shqipërisë në Republikën Federale të Gjermanisë, rezident.
Sakaq është liruar edhe Adia Sakiqi, deri sot ambasadore e Shqipërisë në Mbretërinë e Vendeve të Ulëta, rezident. Ajo ishte edhe ambasadore pranë Organizatave për Ndalimin e Armëve Kimike (OPCW), jorezidente.
Megjithatë Adia Sakiqi është emëruar ambasadore në Gjermani, në vend të Kukos.
Një tjetër lirim nga detyra është ai i Kastriot Robos nga detyra e ambasadorit në Republikën e Turqisë, rezident.
Robo ishte njëkohësisht ambasador edhe në Republikën e Azerbajxhanit, në Republikën Islamike të Iranit, në Republikën e Kirgistanit, në Republikën Islamike të Pakistanit, në Gjeorgji, në Republikën Islamike të Afganistanit dhe në Republikën e Kazakistanit, si jorezident.
Blerta Kadzadej është emëruar në vend të Robos.
Me dekret të Begajt është liruar edhe Floreta Faber si ambasadore e Shqipërisë në Shtetet e Bashkuara të Amerikës, rezident, si dhe nga detyra e Ambasadorit të Jashtëzakonshëm dhe Fuqiplotë të Republikës së Shqipërisë në Shtetet e Bashkuara të Meksikës, Republikën e Panamasë, Republikën Domenikane, Republikën e Guatemalës dhe në Republikën e Kosta Rikës, jorezident.
Ervin Bushati ka zënë vendin e Faber.
