Aktori i famshëm i filmave aksion në nivel botëror, Jean-Claude Van Damme, do të shkojë në Kosovë. Ikona e aksioneve dhe filmave të cilat kanë shoqëruar ekranet anë e kënd globit, do të gëzojë fansat kosovarë gjatë ditës së sotme.
Ardhjen e tij po e mundëson një kompani zvicerane e orëve, ndërsa lajmin e ka konfirmuar vet ai nëpërmjet një videoje.
Për ardhjen e aktorit ka shkruar edhe kryetari i Drenasit, Ramiz Lladrovci.
“Miku i Kosovës, artisti i mirënjohur Jean-Claude Van Damme, po vije në Kosovë. Ai shumë herë e deklaroi se ka shumë miq shqiptarë, artistë e sportistë, madje bëri shumë herë edhe shqiponjën si shenjë respekti për ne. Miku im Kushtrim Musliu ka miqësi me artistin e madh Van Damme, i cili vjen në Kosovë, për të promovuar markën e orëve të njohura Helfer, nga Zvicra. Besoj se do t’i pëlqej Kosova, pasi me dekada është në shoqëri të vazhdueshme me shqiptarët në botën e filmit dhe jetën e përditshme”, ka shkruar Lladrovci.
