Kushtet e motit nuk ishin më të favorshmet për t’u larë në det paraditen e kësaj të mërkure, por kjo nuk e ka penguar këtë grup të rinjsh të kridhen në detin Adriatik.
Të nisur nga Kolorado (SHBA) e largët, ata e vizitojnë për herë të parë Durrësin dhe Shqipërinë.
Sot kishin zgjedhur shëtitoren “Taulantia”, pranë “Sfinksit” për të bërë ndalesën e radhës dhe ndërkohë që pjesa më e madhe e grupit shijonte detin e këtij fund marsi, të tjerë argëtoheshin duke luajtur me top.
Ndërsa jemi në muajin e parë të pranverës, flukset e para të turistëve kanë nisur të regjistrohen pranë hoteleve të vijës bregdetare të Durrësit. Shtrirja e sezonit përtej 3 muajve të verës, siç ndodhte vitet e kaluara, e ka kthyer qytetin bregdetar në destinacionin kryesor të turizmit në vend.
Strukturat hoteliere bëjnë të ditur se këtë vit presin flukse të reja turistësh, që vijnë për të kaluar për herë të parë pushimet në Durrës nga vende si Franca, Britania e madhe etj. Këtë vit, numri i turistëve nga Italia pritet të jetë edhe më i madh nisur nga shifrat e vitit të kaluar, promocioni që i është bërë Shqipërisë në vendin fqinjë, paketat turistike mjaft konkuruese dhe përshtypjet e mira me të cilat janë larguar italianët nga vendi ynë.
Strategjia e turizmit e institucioneve vendore është për ta kthyer Durrësin në destinacion gjithëvjetor për t’u vizituar nisur nga potenciali turistik, historik etj që qyteti bregdetar zotëron.
M.B.
