Ndeshja Tirana-Vllaznia, që përfundoi 3-4, zhvilluar në Lushnje, pati shumë tension dhe momente frike për disa lojtarë. 

Pasi futbollisti Gruda shënoi golin e katërt për Vllazninë, dhe po festonte me shokët e ekipit, nga tifozët e Tiranës u hodhë një lëndë plasëse që dëmtoi tre lojtarë të shkodranëve. 

24 orë pas ndeshjes, Policia e Shtetit njofton se ka proceduar penalisht dy shtetasit që hodhën lëndët plasëse.

“Lushnjë/Hodhën lëndë piroteknike në stadiumin “Roza Haxhiu”, gjatë një ndeshje futbolli, procedohen penalisht 2 shtetas.

Specialistët për Hetimin e Krimeve të Komisariatit të Policisë Lushnjë, në përfundim të veprimeve hetimore dhe procedurale, për një rast të hedhjes së lëndëve piroteknike në stadiumin “Roza Haxhiu”, gjatë ndeshjes së futbollit “Tirana-Vllaznia”, të zhvilluar ditën e djeshme, referuan materialet në Prokurori, ku nisi procedimi në gjendje të lirë për shtetasit:

-A. M., 19 vjeç dhe K. Ll., 19 vjeç, të dy banues në Tiranë.

Nga hedhja e lëndës piroteknike u dëmtua lehtë, një futbollist i ekipit të Vllaznisë.

Materialet procedurale i kaluan Prokurorisë, për veprime të mëtejshme, për veprat penale “Veprime të dhunshme në aktivitetet sportive” dhe “Prishja e qetësisë publike”, thuhet në njoftim e Policisë së Shtetit.