Një zjarr që ka shpërthyer në një traget në Indonezi ka vrarë të paktën pesë persona, njoftoi roja bregdetare e vendit, ndërsa më shumë se 200 persona u shpëtuan, shumë prej të cilëve u hodhën në det për t’i shpëtuar flakëve.

Trageti KM Barcelona 5 u përfshi nga flakët në brigjet e ishullit Sulawesi, tha Agjencia Indoneziane e Sigurisë Detare, vetëm disa javë pasi të paktën 19 persona vdiqën, kur një traget u fundos në ishullin e Balit.

“Janë raportuar pesë viktima, dy prej të cilëve ende nuk janë identifikuar. Ndërkohë, 284 persona janë evakuuar në mënyrë të sigurt”, tha agjencia në një deklaratë.

Zjarri shpërtheu në pjesën e prapme të tragetit ndërsa ishte në rrugë për në Manado, kryeqytetin e provincës së Sulawesi-t të Veriut.