Një fole grerëzash radioaktive me nivele rrezatimi 10 herë më të larta se limiti ligjor është gjetur në një strukturë që dikur prodhonte pjesë për armët bërthamore të SHBA-së, thanë zyrtarët federalë.
Sipas një raporti nga Departamenti Amerikan i Energjisë, foleja u spërkat për të vrarë grerëzat dhe më pas u asgjësua si mbetje radioaktive, dhe në vendin pranë Aiken, Karolina e Jugut, nuk u gjetën grerëza të gjalla, shkruan BBC.
Hetimi përcaktoi se ndotja nuk lidhej me rrjedhjen e mbetjeve bërthamore dhe se nuk kishte ndikim në mjedis apo në popullsi, raporton BBC.
Foleja u zbulua gjatë kontrolleve rutinë të niveleve të rrezatimit bërthamor në vendndodhjen e lumit Savannah (SRS) pranë Aiken.
Ishte vendosur në një shtyllë pranë vendit ku ruhen miliona litra mbetje bërthamore të lëngshme, por raporti thotë se nuk kishte rrjedhje nga rezervuari.
Nivelet e larta të rrezatimit të regjistruara në fole iu atribuuan të ashtuquajturit “kontaminim radioaktiv i trashëguar lokal”, rrezatim i mbetur nga periudha kur vendi prodhonte në mënyrë aktive pjesë për bomba bërthamore gjatë Luftës së Ftohtë.
Fabrika u hap në vitet 1950 dhe më pas prodhoi plutonium për bërthamën e bombave bërthamore, dhe sot funksionon me fokus në materialin bërthamor për termocentralet.
