Zyra e Prokurorit të Përgjithshëm në Spanjë ka ngritur shqetësimin për fuqizimin dhe bashkëpunimin e bandave shqiptare atje, me ato kineze.

Në një raport të fundit të publikuar për vitin 2024, Prokuroria e Përgjithshme jep një mesazh “shqetësues”, mbi atë se si  “organizatat e mëdha kriminale” bashkëjetojnë në provincën e Malagas dhe Marbellas. 

Nga strukturat mafioze te bandat e zëna me vjedhjen e orëve ose shtëpive luksoze.

Të gjithë bashkëjetojnë në një zonë relativisht të vogël, të vendosur në një nga zonat më miqësore për turistët dhe më të pasura të Evropës.

Ai tregon “ndërlidhjen” e këtyre kriminelëve, duke theksuar “bashkëpunimin” e rrjeteve shqiptare dhe kineze.

Dokumenti, që mbulon të dhëna nga viti 2024, paralajmëron se Malaga dhe Marbella janë “fokusi kryesor” i aktiviteteve të hartuara nga bandat “e sofistikuara” kombëtare dhe të huaja, të cilat kombinojnë trafikun e drogës me strategji të tjera, “të nevojshme për të siguruar fitimet e tyre përmes aktiviteteve të ndryshme dhe komplekse financiare, që lidhen me pastrimin e parave”.

Lidhur me këtë shqetësim, Zyra e Prokurorit thekson urgjencën e “një hetimi të hershëm të pasurive” ndaj këtyre grupeve, të përfshira gjithashtu në pastrimin e parave, në mënyrë që të arrihet “ndjekja penale e njëkohshme e të dy aktiviteteve kriminale”.

Malaga zë gjithashtu një pozicion të dyshimtë të privilegjuar në numrin e çështjeve të hapura nga Zyra e Prokurorit Publik.

Raporti për vitin e kaluar zbulon se kjo provincë pa ” rritjen më të ndjeshme”, me 28.65% më shumë se në vitin 2023.

Në shifra të përgjithshme, ajo gjithashtu konsolidon pozicionin e saj si provinca e tretë – vetëm pas Barcelonës dhe Madridit – me më shumë raste të lidhura me trafikun e drogës.

Shumë ekspertë me përvojë e krahasojnë luftën kundër trafikut të drogës me efektin e tullumbaceve : nëse ushtroni shumë presion në një vend, ai zhvendoset në një tjetër.

Dhe kjo është ajo që aludon Zyra e Prokurorit, duke theksuar edhe një herë se presioni policor në Campo de Gibraltar, po i zhvendos aktivitetet e trafikut të drogës në Costa del Sol./ Malaga Hoy.