Një mësues i gjuhës angleze në një shkollë të arsimit bazë në Tiranë është pushuar nga puna, pasi dyshohet se ka predikuar në shkollë. Rasti ka shqetësuar ekspertët e arsimit dhe psikologët të cilët e denojnë rastin dhe kërkojnë kontrolle në sistemin arsimor
Një rast shqetësues është regjistruar në një shkollë të arsimit bazë në Tiranë, ku një mësues i gjuhës angleze është pushuar nga puna, pasi dyshohet se predikonte dhe indokrinonte nxënësit gjatë orës së mësimit.
Sipas prindërve, mësuesi ka përdorur shprehje dhe mesazhe me përmbajtje fetare të dëshmitarëve të Jehovait dhe pas ankesave të depozituara, autoritetet kanë vendosur pushimin nga puna të mësuesit.
Për pedagogen Nora Malaj, institucionet arsimore duhet të jenë një hapësirë neutrale, ku nxënësit edukohen mbi baza shkencore dhe akademike, pa ndikime fetare, politike apo ideologjike.
Malaj për Ora News shton se arsimi publik në vend është laik dhe i mbështetur në Kushtetutë, dhe çdo shkelje e këtij parimi cenon të drejtën e prindërve për të zgjedhur edukimin fetar të fëmijëve të tyre jashtë shkollës.
Nga ana gjetër psikologët e konsiderojnë përfshirjen e mesazheve fetare në procesin mësimor si të dëmshme për zhvillimin emocional, pasi fëmijët në këto mosha nuk kanë aftësinë e nevojshme kritike për të dalluar bindjet personale nga informacionet e ndryshme, çka mund të shkaktojë frikë, hutim apo ndjenjë faji. Shoqata “Dëshmitarët e Jehovait në Shqipëri” në një reagim, thotë se mësuesi në fjalë nuk ka qenë “asnjëherë anëtar” dhe nuk ka asnjë lidhje me ta.
