Gjykata e Posaçme kundër Korrupsionit dhe Krimit të Organizuar ka dënuar Klajdi Zhillën dhe Geraldo Fuçian, dy ish inspektorët e Inspektoriatit të Mbrojtjes së Territorit (IMT), për veprën penale “Korrupsioni pasiv i personave qe ushtrojnë funksione publike”, në bashkëpunim. Ata akuzohen se kanë marrë 1 mijë euro rryshfet për të mos hequr tendën e një lokali në Tiranë.

Klajdi Zhilla u dënua me 3 vite burgim, por në aplikim të gjykimit të shkurtuar, dënimi iu ul në dy vite.  Përfundimit, gjykata e Posaçme vendoi pezullimin e ekzekutimit të dënimit dhe vënien në shërbim prove për të paktën dy vite. Po ashtu, atij iu është hequr e drejta për të ushtruar e drejta për të mbajtur poste publike për 5 vite.

Edhe Geraldo Fuçija u dënua me 3 vite nga GJKKO, dhe në aplikim të dënimit të shkurtuar, iu uyl në 2 vjet. Por, edhe ndaj tij, gjykata e Posaçme vendosi pezullimin e ekzekutimit të dënimit, duke e konvertuar në shërbim 2 vjeçar prove. Edhe Geraldo Fuçija nuk do të mundet të mbajë poste publike për të paktën 5 vjet.

Denoncimi për zyrtarët e IMT u bë nga një pronari i lokalit, i cili ka kallëzuar se inspektorët i kishin kërkuar 1,000 euro ryshfet për një tendë të vendosur pa leje.

Njoftimi i gjykatës:

Prokuroria e Posaçme kundër Korrupsionit dhe Krimit të Organizuar ka paraqitur pranë Gjykatës kërkesën me objekt: “Gjykimin e procedimit penal nr. 12/1 të viti 2024 të Prokurorisë së Posaçme, ndaj të pandehurve Klajdi Zhilla dhe Geraldo Fuçija, të akuzuar për kryerjen e veprës penale “Korrupsion pasiv i personave që ushtrojnë funksione publike”, parashikuar nga neni 259/2 dhe 25 i Kodit Penal”.

  1. Gjykimi i kësaj ҫështje u zhvillua me rregullat e gjykimit të shkurtuar. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtarët Rudina Palloj, Flojera Davidhi dhe Bib Ndreca, me vendimin nr. 20, datë 24.02.2026 vendosi:
  2. Deklarimin fajtor të të pandehurit Klajdi M. Zhilla për kryerjen e veprës penale “Korrupsioni pasiv i personave qe ushtrojnë funksione publike”, në bashkëpunim, parashikuar nga neni 259/2 në lidhje me nenin 25 të Kodit Penal dhe dënimin e tij me 3 (tre) vite burgim. 2. Në aplikim të nenit 406/1 të Kodit të Procedurës Penale të pandehurit Klajdi M. Zhilla i ulet 1/3 (një e treta) e dënimit, duke u dënuar përfundimisht me 2 (dy) vite burgim.
  3. Në zbatim të nenit 59 të Kodit Penal, pezullimin e ekzekutimit të dënimit me burgim dhe vënien në provë të të pandehurit Klajdi M. Zhilla për një periudhë kohe prej 2 (dy) vite, me kusht që i pandehuri të mos kryejë vepër tjetër penale dhe gjatë kohës së provës të mbajë kontakte me Shërbimin e Provës që mbulon vendbanimin e tij.
  4. Në zbatim të nenit 35, pg 1 të Kodit Penal, caktimin ndaj të pandehurit Klajdi M. Zhilla të dënimit plotësues “Heqja e së drejtës për të ushtruar funksione publike”, për një kohë prej 5 (pesë) vitesh.
  5. Bazuar në nenin 261 dhe 389 të Kodit të Procedurës Penale, heqjen e masës së sigurimit “Arrest në burg”, parashikuar nga neni 239 i Kodit të Procedurës Penale, caktuar ndaj të pandehurit Klajdi M. Zhilla me vendimin nr.96, datë 09.02.2024, të Gjykatës së Posaçme të Shkallës së Parë për Korrupsionin dhe Krimin e Organizuar.
  6. Urdhërohet lirimi i menjëhershëm i të pandehurit Klajdi M. Zhilla nga paraburgimi nëse nuk mbahet për shkak të një vendimi tjetër.
  7. Deklarimin fajtor të të pandehurit Geraldo T. Fuçija për kryerjen e veprës penale “Korrupsioni pasiv i personave që ushtrojnë funksione publike”, në bashkëpunim, parashikuar nga neni 259/2 në lidhje me nenin 25 të Kodit Penal dhe dënimin e tij me 3 (tre) vite burgim.
  8. Në aplikim të nenit 406/1 të Kodit të Procedurës Penale të pandehurit Geraldo T. Fuçija i ulet 1/3 (një e treta) e dënimit, duke u dënuar përfundimisht me 2 (dy) vite burgim.
  9. Në zbatim të nenit 59 të Kodit Penal, pezullimin e ekzekutimit të dënimit me burgim dhe vënien në provë të të pandehurit Geraldo T. Fuçija për një periudhë kohe prej 2 (dy) vite, me kusht që i pandehuri të mos kryejë vepër tjetër penale dhe gjatë kohës së provës të mbajë kontakte me Shërbimin e Provës që mbulon vendbanimin e tij.
  10. Në zbatim të nenit 35, pg 1 të Kodit Penal, caktimin ndaj të pandehurit Geraldo T. Fuçija të dënimit plotësues “Heqja e së drejtës për të ushtruar funksione publike”, për një kohë prej 5 (pesë) vitesh.
  11. Bazuar në nenin 261 dhe 389 të Kodit të Procedurës Penale, heqjen e masës së sigurimit “Arrest në burg”, parashikuar nga neni 239 i Kodit të Procedurës Penale, caktuar ndaj të pandehurit Geraldo T. Fuçija me vendimin nr.96, datë 09.02.2024, të Gjykatës së Posaçme të Shkallës së Parë për Korrupsionin dhe Krimin e Organizuar.
  12. Urdhërohet lirimi i menjëhershëm i të pandehurit Geraldo T. Fuçija nga paraburgimi nëse nuk mbahet për shkak të një vendimi tjetër.
  13. Në zbatim të nenit 190/1pika c e Kodit të Procedurës Penale, 2 (dy) D.V.D. një me përmbajtjen e bisedave të zhvilluara midis shtetasve A.B e Klajdi Zhilla dhe një me përmbajtjen e bisedave ambientale të zhvilluara midis të pandehurve Klajdi Zhilla e Geraldo Fuçija në ambientet e Drejtorisë së Përgjithshme të Policisë së Shtetit, të asgjësohen, pasi vendimi të marrë formë të prerë.
  14. Shpenzimet procedurale të bëra gjatë hetimeve paraprake, sipas procesverbalit për evidentimin e shpenzimeve të hetimit, dhe ato gjyqësore, sipas procesverbalit përkatës për evidentimin e shpenzimeve gjyqësore, në referim të neneve 393/1 dhe 285/1 të K.Pr.Penale, i ngarkohen të pandehurve të cilët deklarohen fajtorë, në mënyrë solidare.
  15. Ngarkohet Prokuroria e Posaçme kundër Korrupsionit dhe Krimit të Organizuar zbatimin e këtij vendimi. 16. Kundër këtij vendimi mund të bëhet ankim në Gjykatën e Apelit kundër Korrupsionit dhe Krimit të Organizuar, brenda 15 (pesëdhjetë) ditëve, duke filluar ky afat nga e nesërmja e njoftimit të vendimit të arsyetuar.