Një ndeshje e çmendur u zhvillua në Durrës, ku Teuta dhe Partizani dhuruan një spektakël të vërtetë me katër gola dhe disa pretendime për penallti, duke i mbajtur emocionet deri në fund. Në tribunë u vu re edhe prania e presidentit të Partizanit, Gazment Demi, i cili shoqërohej nga Jasir Asani.
-Atmosfera ishte elektrizuese falë tifozërisë durrsake, që iu përgjigj thirrjes së klubit duke mbushur stadiumin. Rreth 4000 tifozë krijuan një ambient fantastik, duke treguar edhe një herë se Durrësi e do futbollin. Një notë 10 për mbështetjen e tyre.
-Momente të pafata për sulmuesin Klejdi Daci, i cili u dëmtua gjatë lojës dhe u detyrua të largohej nga fusha, duke i lënë vendin Vilës.
-Nuk munguan as tensionet në tribunë, ku trajneri i Partizanit, Oltion Kërnaja (i dënuar), u përfshi në një debat me tifozët vendas. Situata detyroi largimin e tij nga tribuna.
-Protagonist i ndeshjes ishte Vasili Zogos, i cili realizoi dopietën e parë sezonale. Në fund ai ishte shumë pranë golit të tretë, por fati dhe ndërhyrja e portierit Pano Qirko ia mohuan këtë mundësi.
-Gjatë gjithë ndeshjes, stafi i Partizanit komunikonte vazhdimisht nga poshtë tribunës me trajnerin në distancë për çdo lëvizje taktike në fushë.
