Teuta u mund minimalisht 1-0 në transfertë. Një ndeshje e vendosur nga detajet la shije të hidhur te skuadra bregdetare, e cila nuk arriti të konkretizojë rastet e krijuara. Në përfundim të takimit, mesfushori Xhoele Maçolli foli për analizën e kësaj disfate, problemet në lojë dhe reagimin që pritet nga ekipi në vazhdim.
Xhoele, si e komentoni humbjen 1-0 në Vorë?
Ishte një ndeshje shumë e vështirë për ne. E dinim që do të përballeshim me një kundërshtar të fortë në fushën e tyre, por besoj se dhamë maksimumin tonë. Një moment i vetëm vendosi gjithçka dhe kjo të lë shije të hidhur.
Çfarë mendoni se nuk funksionoi te Teuta?
Mendoj se na mungoi konkretizimi në fazën sulmuese. Krijuam disa raste, por nuk arritëm t’i shfrytëzonim.
Si ishte atmosfera në skuadër pas ndeshjes?
Normalisht ka zhgënjim. Askush nuk e pëlqen humbjen, sidomos kur e di që mund të kishe marrë më shumë. Por duhet të reagojmë shpejt, sepse kampionati vazhdon dhe nuk kemi kohë të ndalemi shumë te kjo ndeshje.
Çfarë duhet të përmirësoni për ndeshjet e ardhshme?
Duhet të jemi më të përqendruar në çdo moment të lojës. Detajet bëjnë diferencën. Duhet të punojmë më shumë në finalizim dhe të ruajmë qetësinë në momente kyçe.
Një mesazh për tifozët e Teutës?
I falënderojmë për mbështetjen, edhe në momente të vështira. Do të japim maksimumin për t’u rikthyer te rezultatet pozitive dhe për t’i bërë krenarë.
