Autoriteti i Shëndetit Publik në Suedi ka bërë thirrje që prindërit të kufizojnë përdorimin e telefonave celularë kur janë pranë fëmijëve, duke paralajmëruar se përdorimi i tepërt i ekraneve nga të rriturit ndikon negativisht në zhvillimin e tyre.
Në udhëzimet e reja, autoritetet këshillojnë që telefoni të lihet mënjanë gjatë kohës së kaluar me fëmijët dhe të përdoret vetëm kur është e nevojshme ose kur ka një përdorim të përbashkët.
Sipas ekspertëve, mënyra si sillen prindërit me teknologjinë ndikon drejtpërdrejt tek fëmijët. Studimet e kryera në Suedi tregojnë se fëmijët priren të kopjojnë zakonet digjitale të prindërve, dhe përdorimi i shpeshtë i telefonit mund të ulë komunikimin dhe ndërveprimin mes tyre.
Autoritetet rekomandojnë gjithashtu krijimin e zonave pa ekrane në shtëpi, si tavolina e ngrënies dhe dhoma e gjumit, si dhe kujdes të shtuar me publikimin e fotove dhe videove të fëmijëve në internet.
Ministri suedez për Çështjet Sociale ka ngritur shqetësimin se ndikimi i telefonave në jetën familjare shpesh nënvlerësohet.
Në Suedi prej kohësh janë në fuqi edhe udhëzime për kohën që fëmijët duhet të kalojnë para ekraneve: pa ekrane për fëmijët nën 2 vjeç, deri në 1 orë në ditë për moshat 2–5 vjeç, 2 orë për 6–12 vjeç dhe deri në 3 orë për adoleshentët.
Po ashtu rekomandohet që pajisjet elektronike të mos përdoren para gjumit dhe të mos mbahen në dhomën e fjetjes gjatë natës. Nga viti shkollor 2026–2027, Suedia pritet të ndalojë përdorimin e telefonave inteligjentë në shkolla për nxënësit deri në klasën e nëntë.
