Të paktën tetë persona humbën jetën dhe 15 të tjerë mbetën të plagosur si pasojë e sulmeve ajrore izraelite që goditën Qytetin e Gazës në orët e para të mëngjesit, sipas mbrojtjes civile palestineze.
Zëdhënësi i mbrojtjes civile, Mahmoud Bassal, deklaroi se pesë persona u vranë në një sulm ndaj një apartamenti në veriperëndim të qytetit, ndërsa dy të tjerë humbën jetën nga një goditje në jugperëndim të Gazës. Një viktimë tjetër u raportua pas bombardimit të një shtëpie në kampin e refugjatëve Ash Shati, në perëndim të qytetit.
Sulmet e fundit vijnë në një kohë kur situata në Rripin e Gazës mbetet e tensionuar, pavarësisht armëpushimit të shpallur më 10 tetor 2025 pas dy vitesh lufte. Sipas Ministrisë së Shëndetësisë të administruar nga Hamasi, më shumë se 900 palestinezë janë vrarë që nga hyrja në fuqi e armëpushimit, ndërsa incidentet vdekjeprurëse vazhdojnë pothuajse çdo ditë. Shifrat e publikuara nga ministria konsiderohen të besueshme edhe nga Kombet e Bashkuara.
Faza e parë e armëpushimit mundësoi lirimin e pengjeve të fundit izraelite të mbajtura nga Hamasi në këmbim të lirimit të të burgosurve palestinezë nga burgjet izraelite. Megjithatë, faza e dytë e marrëveshjes, e cila parashikonte çarmatosjen e Hamasit dhe tërheqjen graduale të ushtrisë izraelite nga Gaza, nuk ka shënuar progres.
Javën e kaluar, kryeministri izraelit Benjamin Netanyahu deklaroi se kishte urdhëruar ushtrinë të merrte kontrollin e 70% të territorit të Rripit të Gazës. Sipas vlerësimeve, forcat izraelite aktualisht kontrollojnë rreth 60% të enklavës palestineze.
Ndërkohë, në fund të majit, ushtria izraelite vrau në një sulm ajror Mohammed Oda, i cili sapo kishte marrë drejtimin e krahut ushtarak të Hamasit. Ai u eliminua vetëm 11 ditë pas vrasjes së paraardhësit të tij, duke thelluar më tej përplasjet mes palëve.
