Qytetarët zviceranë po votojnë sot në një referendum që mund të sjellë ndryshime të rëndësishme në politikat e emigracionit dhe menaxhimin e rritjes së popullsisë në vend.
Nisma është propozuar nga Partia Popullore Zvicerane (SVP), e cila kërkon vendosjen e një kufiri për numrin e banorëve në Zvicër deri në vitin 2050. Sipas propozimit, popullsia nuk duhet të kalojë 10 milionë banorë.
Aktualisht, Zvicra ka rreth 9.1 milionë banorë. Nëse referendumi miratohet, masat për kufizimin e azilkërkuesve dhe ribashkimin familjar do të hyjnë në fuqi kur popullsia të arrijë rreth 9.5 milionë banorë.
Propozimi parashikon gjithashtu që, nëse rritja e popullsisë nuk frenohet, vendi mund të rishikojë marrëveshjen për lëvizjen e lirë me Bashkimin Evropian.
Qendrat e votimit do të jenë të hapura për disa orë gjatë ditës, ndërsa shumica e qytetarëve kanë votuar me postë. Rezultatet e para priten në pasditen e së dielës.
Sondazhet kanë treguar luhatje në mbështetjen për nismën, duke e bërë rezultatin e referendumit të pasigurt.
