Sekretarja e shtypit e Shtëpisë së Bardhë, Karoline Leavitt, do të largohet nga detyra në fund të muajit, ka njoftuar presidenti amerikan Donald Trump.
Trump bëri të ditur vendimin përmes një postimi në rrjetin social Truth Social, duke deklaruar se Leavitt do të largohet nga pozicioni për t’i kushtuar më shumë kohë familjes së saj.
“Karoline tani do të jetë një nga këshilltaret e mia kryesore të jashtme dhe një zë me ndikim brenda Partisë Republikane”, tha Trump.
Leavitt, e cila është një nga zyrtaret më të afërta me administratën Trump, ka shërbyer si zëdhënëse kryesore e Shtëpisë së Bardhë. Ajo ka qenë një figurë e rëndësishme në komunikimin e politikave dhe qëndrimeve të administratës amerikane.
Dorëheqja e saj pritet të hyjë në fuqi në fund të gushtit.
Kush është Karoline Leavitt?
Karoline Leavitt e mori detyrën në janar 2025, në moshën 27-vjeçare, në fillim të mandatit të dytë të Donald Trump, hyri në histori si sekretarja më e re e shtypit e Shtëpisë së Bardhë.
Leavitt u rikthye së fundmi nga leja prindërore, pasi në maj solli në jetë fëmijën e saj të dytë, një vajzë. Ajo është gjithashtu nënë e një djali 2-vjeçar.
Fillimisht e interesuar për gazetarinë, Leavitt u orientua shpejt drejt politikës. Ajo nisi karrierën në Shtëpinë e Bardhë gjatë mandatit të parë të Trump, ku punoi në zyrën e shtypit nën drejtimin e atëhershëm të zëdhënëses Kayleigh McEnany.
Pas humbjes së Trump në zgjedhjet presidenciale të vitit 2020 ndaj Joe Biden, Leavitt punoi në zyrën e kongresmenes Elise Stefanik, një prej mbështetëseve më të zëshme të Trump në Partinë Republikane.
Në vitin 2022, ajo kandidoi për një vend në Dhomën e Përfaqësuesve, por nuk arriti të fitonte zgjedhjet.
Më pas, Leavitt punoi si zëdhënëse e MAGA Inc. përpara se t’i bashkohej fushatës së tij presidenciale të vitit 2024, e cila përfundoi me rikthimin e Trump në Shtëpinë e Bardhë.
