Ish-deputeti i Durrësit dhe kreu i PAA-së, Agron Duka shtron pyetjen nëse “do të hetojë Prokuroria ata që po shkatërrojnë Durrësin”.
Përmes një postimi në Facebook, të cilin e shoqëron edhe me video nga përmbytja e tregut industrial në Durrës, Duka shprehet:
“Asnjë aftësi menaxhuese, asnjë aftësi teknike për t’i dhënë zgjidhje këtij fenomeni, asnjë qindarkë e shpenzuar në pastrimin e kanaleve të kullimit (sidomos në kanalin e ujërave të larta) por vetëm në beton.
Kush do të përgjigjet për dëmet ekonomike, tanimë të përvitshme, që përmbytjet po i shkaktojnë qytetarëve të Durrësit?”.
Më herët gjatë ditës, Duka ironizoi në rrjetet sociale duke postuar një video me përmbytjet në lagjen nr.18 në Durrës, të cilën e shoqëronte me diçiturën: Durrësi i shekullit XXI.
Postimi i plotë i Dukës:
“Ujqërit e opozitës dhe çakejtë e mazhorancës”
Sot Durrësi, si shumë zona të tjera të Shqipërisë, është nën pushtetin e ujit.
Jemi të gjithë të vetëdijshëm se nuk kemi të bëjmë vetëm me një fatkeqësi natyrore.
Shiu dhe balta treguan edhe një herë imazhin e vërtet të mazhorancës (në pushtetin qendror dhe vendor).
Asnjë aftësi menaxhuese, asnjë aftësi teknike për t’i dhënë zgjidhje këtij fenomeni, asnjë qindarkë e shpenzuar në pastrimin e kanaleve të kullimit (sidomos në kanalin e ujërave të larta) por vetëm në beton.
Kush do të përgjigjet për dëmet ekonomike, tanimë të përvitshme, që përmbytjet po i shkaktojnë qytetarëve të Durrësit?
Prej një kohe të gjatë po flitet për drejtësi, dhe reformimin e saj, por deri më tani jemi përballë “ujqërve” të opozitës (të cilët fajësohen për gjithçka në këtë vend), dhe “çakejve” të mazhorancës (të cilët po bëjnë kërdinë me veprimet ose mosveprimet e tyre).
A do të hetojë Prokuroria ata që po shkatërrojnë Durrësin?
