Ministrja e Jashtme spanjolle Arancha González Laya në një intervistë për rrjetin spanjoll Antena 3, tha se ventilatorët dhe pajisjet e tjera mjekësore e blera në Turqi do të nisen për në Spanjë ditën e sotme.
Pajisjet pritet të jenë të disponueshme për shpërndarje midis qeverive rajonale në Spanjë ditën e martë. Ventilatorët, të prodhuar nga një kompani në Turqi, janë mbajtur nga autoritetet lokale në Ankara që nga e premtja e 3 prillit, shkruan CNN.
“Ne do të qëndrojmë gjithmonë pranë mikut tonë Spanja. Ne do t’i kapërcejmë këto kohë të vështira së bashku”, deklaroi ministri i jashtëm turk Mevlut Cavusoglu në Twitter.
Spanja është vendi i dytë në botë më i prekur nga Covid-19, me 13,055 viktima dhe 135,032 të infektuar.
