Askush nuk di të thotë se përse hapësira gjigande që dikur ishte destinuar për kantierin detar ka mbetur një gërmadhë e vërtetë e pashfrytëzuar.

Sipas zërave, hapësira e ish-kantierit, ku tanimë kanë mbetur vetëm gjurmët e dikurshme të lavdisë së tij, me rreth 2 mijë punëtorë, i ka kaluar në pronësi turqve të Kurumit.

Por kjo kompani e cila ka falimentuar në metalurgjikun e Elbasanit, edhe këtë super sipërfaqe në qendër të portit të Durrësit, e ka lënë tërësisht të pa vënë në shfrytëzim, dhe ende nuk dihet çfarë pazaresh po bëhen për të.

“DurrësLajm” ka qenë në port dhe operatori ynë na sjell pamjet e xhiruara ku duket qartë se nga lavdia e dikurshme, tanimë aty kanë mbetur vetëm disa gjurmë mizore.

Anijet prej druri kanë mbetur tërësisht të kalbura, pasi edhe doku ku riparoheshin anijet edhe pajisja tjetër slipi, u prenë dhe u dërguan në metalurgjikun e Elbasanit, ku u shkrinë për skrap.

Në bazë të një studimi nga Kompania holandeze "Royal Asconing", është sugjeruar që territori në të cilin ndodhet kantieri  detar "Durrës Kurum Shipping" sh.a., duhet të kalojë në administrimin e APD-së.

Në bazë të këtij studimi, thuhet se territori ku ndodhet kantieri  detar, do të destinohet për shërbime portuale si terminal çimentoje, terminal kontejnerësh, terminal tragetesh, si dhe terminale për shërbime të tjera

Kantieri Detar i Durrësit i cili në vitet '90 u privatizua nga çekët e Gdanskut, i kaloi në pronësi Kurumit, pas 2003-shit.  Por kjo kompani  e shkriu aktivitetin e riparimit të anijeve në kantier dhe doku doli jashtë funksionit, ndërsa mbi 300 punëtorë dolën të papunë me mbylljen e aktivitetit të kantierit.  

Pse Kantieri i Durrësit ishte lavdia e flotës sonë të anijeve tregtare e të peshkimit?

Në vitin 1968, prodhohet anija metalike "Punëtori" dhe më pas lëshohet në det rimorkiatori i parë i prodhimit shqiptar "Debatik" me fuqi 1000 kuaj fuqi dhe gjatësi 32 m. Në vitin 1970 filloi riparimi i anijes 5000 tonëshe "Durrësi", riparim i cili tregoi aftësitë e rritura të Kantierit Detar, i cili po fillonte tashmë në nivelin e riparimit të anijeve oqeanike. 

Në vitin 1974, Kantieri është transferuar në sheshin ku ndodhet sot KURUM. Kjo u bë pas një përvoje 30-vjeçare të tij dhe për këtë u ndërtuan shkallë me përmasa të mëdha në të cilat u lëshuan në det anijet "Saranda" 1000 DwT dhe "Gjirokastra" 2700 DwT. Për këto prodhime kanë dhënë një ndihmesë të veçantë Inxhinierët Gani Ismailati, Hysni Peku, Hysni Qehajai, si dhe mjeshtërit Xhevdet Karapici, e Abdulla Curri.

Më pas zhvillimet në Kantierin Detar vazhduan me krijimin e repartit të riparimit të vaporëve e mjeteve të mëdha detare që arriti të kryejë riparime kapitale të rimorkiatorëve, shalandave, Bigen "Adem Reka", të dragave "Rodon" e "Adriatik" të anijeve 500 tonëshe, të avulloreve "Durrësi" , "Partizani", "Liria" etj. Punime Kapitale u kryen edhe në anijet oqeanike "Tirana", "Vlora", "Shkodra" dhe "Arbëria".  Me shumë vlerë ishte ngritja e repartit të prodhimeve të reja, sepse aty u realizua ndërtimi i shumë mjeteve detare deri në seri si anije pilotazhi, anije peshkimi KP 300, peshkatore 2KP- 408, anije 500 tonëshe si "Ali Kelmendi", "Vjosa", "Ylli i Kuq", "Dajti", "Bajram Curri", "Beqir Nova", "Adriatiku", "Tomori", tragete të ndryshme për zonat e liqeneve në veri, si dhe u projektuan e u prodhuan portat e H/C- ve të Veriut.

Disa të dhëna mbi Portin e Durrësit, porti më i madh në Shqipëri dhe porta hyrëse e Korridorit VIII.

– Porti i Durrësit ndodhet në pjesën Jug-Perëndimore të  Durrësit dhe është 36 km larg nga Tirana.

– Porti nuk  ka më  akses rrugor dhe hekurudhor.

– Sipërfaqja ujore është 67 Ha

– Sipërfaqja tokësore është 80 Ha

– Përmban 11 kalata

K.H.