Ish kryeministri italian: Evropa duhet të bashkohet ose rrezikon të bëhet një ‘koloni’ e SHBA-së dhe Kinës

Ish kryeministri italian, Enrico Letta thotë se Evropa duhet të vazhdojë të përshpejtojë planin për të integruar tregun e vetëm dhe për të krijuar një strategji industriale për të shmangur nënshtrimin ndaj superfuqive globale.

“Ne nuk duam të jemi koloni e SHBA-së, dhe nuk duam të jemi koloni e Kinës, ne duam të jemi evropianë”, tha ish-kryeministri italian.

Në vitin 2024, Letta publikoi një raport mbi mënyrën e përfundimit të tregut të vetëm, i cili frymëzoi hartën e rrugës së BE-së se si ta bëjë Evropën më konkurruese.

Raporti, i titulluar “Shumë më shumë se një treg”, theksoi nevojën për të integruar sektorët kryesorë në nivel evropian, siç është krijimi i një bashkimi energjetik, integrimi i shërbimeve dixhitale dhe dhënia fund e fragmentimit të tregjeve të kapitalit.

Përveç kësaj, Letta propozoi një “liri të pestë” të kërkimit dhe inovacionit, me qëllim vendosjen e ekonomisë së dijes në krye të axhendës së politikave ekonomike të BE-së.

Duke folur për Euroneës, Letta tha se Evropa më në fund duket se po e përballon domosdoshmërinë për të bërë diçka përpara se të bjerë nga kategoria, pjesërisht falë kërcënimeve të Presidentit të SHBA-së, Donald Trump, për të pushtuar territorin danez të Groenlandës.

“Pati një përshpejtim në tre muajt e fundit. Viti 2025 ishte një vit në të cilin të gjithë u tronditëm nga epoka e re Trump II, tarifat, luftërat dhe të tjerat. Pastaj ndodhi Groenlanda. Mendoj se Groenlanda ishte një thirrje e madhe zgjimi për të gjitha vendet dhe udhëheqësit evropianë.”, shtoi ai.

Komisioni Evropian kohët e fundit lançoi strategjinë e re “Një Evropë, Një Treg”, sipas së cilës do t’i japë përparësi propozimeve legjislative që mund të rrisin konkurrueshmërinë evropiane në shkallë globale.

Strategjia përshkruan 42 reforma në nivel BE-je për të përfunduar tregun e vetëm, me afate specifike për secilin propozim.

Ndër reformat e propozuara janë krijimi i një strategjie të fortë industriale sipas Aktit të Përshpejtuesit Industrial dhe i ashtuquajturi Regjimi i 28-të, ose “EU Inc”, një propozim legjislativ që do ta bënte më të lehtë për bizneset të hapen në Evropë. BE-ja synon të miratojë të dy shtyllat legjislative deri në fund të vitit.

“Sot ekzistojnë të gjitha aspektet themelore për t’i bërë evropianët të vetëdijshëm se kemi një mundësi për të qenë më të bashkuar dhe më autonomë”, tha Letta.