Kriza mes Italisë dhe Spanjës për emigracionin dhe sigurinë kufitare thellohet. Roma ka vendosur të zgjasë deri më 30 shtator pezullimin e zbatimit të rregullave të Shengenit me Spanjën, ndërsa Madridi është kundërpërgjigjur duke zgjatur kontrollet ndaj udhëtarëve që vijnë nga Italia.

Italia do të vijojë kontrollet në kufijtë e brendshëm me Spanjën, pas vendimit të Ministrisë së Brendshme italiane. Masa, e cila ishte vendosur fillimisht pas krizës në Ceuta dhe ishte rinovuar më pas, është justifikuar nga Roma me “profile të larta rreziku”, përfshirë edhe mundësinë e “infiltrimeve terroriste”.

Vendimi italian ka shkaktuar reagim të menjëhershëm nga qeveria spanjolle. Ministri i Jashtëm i Spanjës, José Manuel Albares, e ka cilësuar vendimin e Romës si të papranueshëm.

“Kjo do të thotë të minosh frymën dhe filozofinë e asaj që do të thotë të jesh partner evropian. Është absurde, e panevojshme. Një turp”, deklaroi Albares.

Në përgjigje të vendimit italian, Spanja ka zgjatur deri më 8 tetor mundësinë për të kryer kontrolle në portet dhe aeroportet e saj ndaj udhëtarëve që mbërrijnë nga Italia.

Sipas Albares, nuk ekziston asnjë kërcënim për integritetin e zonës Shengen nga situata në Ceuta dhe Melilla. Ai ka kritikuar gjithashtu kryeministren italiane Giorgia Meloni dhe ministrin e Jashtëm Antonio Tajani, duke i akuzuar se po veprojnë më shumë si drejtues politikë sesa si liderë evropianë.

Tajani i është përgjigjur duke mohuar se vendimi i Italisë ka motive politike.

“Nuk ka asnjë zgjedhje politike. Italia mbron vetëm sigurinë e saj, duke zbatuar rregullat dhe traktatet evropiane”, tha Tajani.

Sipas tij, reagimi i Spanjës është “i pavend, i papërshtatshëm dhe në mënyrë të panevojshme agresiv”.

Përplasja diplomatike mes Romës dhe Madridit u përshkallëzua pas krizës së Ceutës, kur mijëra emigrantë hynë ilegalisht në enklavën spanjolle në territorin e Marokut.

Italia vendosi fillimisht pezullimin e marrëveshjes së Shengenit me Spanjën në fillim të gushtit dhe më pas e rinovoi masën për një periudhë tjetër.

Madridi, nga ana tjetër, argumenton se mbërritja e rreth 70 mijë personave në Ceuta nuk përbën një rrezik shtesë për hapësirën evropiane, pasi, sipas autoriteteve spanjolle, emigrantët nuk kanë vijuar drejt territorit të Spanjës nga Afrika e Veriut.

Albares ka theksuar gjithashtu se Italia aktualisht regjistron rreth dyfishin e hyrjeve të parregullta në krahasim me Spanjën. Ai ka kujtuar rastin e Lampedusës në vitin 2023, kur Spanja, sipas tij, tregoi solidaritet ndaj Italisë duke pranuar emigrantë të parregullt.

Çështja ka mbërritur edhe në Parlamentin Evropian, ku emigracioni dhe kriza e Ceutës kanë shkaktuar përplasje politike.

Eurodeputeti italian Sandro Ruotolo ka kritikuar qeverinë Meloni, duke ngritur pyetjen nëse solidariteti evropian duhet të kërkohet për emergjencën në Lampedusa dhe të refuzohet kur bëhet fjalë për Ceutën.

Edhe presidentja e grupit të Socialistëve dhe Demokratëve, Iratxe García Pérez, ka kritikuar qasjen e qeverisë italiane ndaj menaxhimit të kufijve dhe emigracionit.

Ndërkohë, komisioneri evropian për Migracionin dhe Çështjet e Brendshme, Magnus Brunner, ka deklaruar se kriza e Ceutës ishte një “provë për sistemin evropian”, por se ajo nuk solli hyrjen e emigrantëve në zonën Shengen.

Sipas tij, integriteti i hapësirës Shengen mbeti i paprekur.

Përplasja mes Romës dhe Madridit tashmë shkon përtej çështjes së kontrollit kufitar, duke hapur një debat më të gjerë brenda Bashkimit Evropian për emigracionin, sigurinë e kufijve dhe parimin e solidaritetit mes vendeve anëtare.