Përplasja mes Izraelit dhe Organizatës së Kombeve të Bashkuara është thelluar edhe më shumë, pasi ambasadori izraelit në OKB, Danny Danon, reagoi ashpër ndaj raportit të ardhshëm të Sekretarit të Përgjithshëm, Antonio Guterres, ku Izraeli përfshihet në listën e zezë për dhunë seksuale në zonat e konfliktit.
“Ne kemi mbaruar me këtë Sekretar të Përgjithshëm”, deklaroi Danon në një video të publikuar në rrjetin X, duke e cilësuar vendimin si “skandaloz” dhe “të papranueshëm”. Ai akuzoi OKB-në se po vendos Izraelin në të njëjtën listë me Hamasin dhe se po përhap “gënjeshtra” kundër shtetit hebre.
Misioni izraelit në OKB njoftoi se nuk do të ketë më kontakte me zyrën e Guterres për aq kohë sa ai të qëndrojë në krye të organizatës. Edhe Ministria e Jashtme izraelite reagoi me tone të forta, duke e cilësuar OKB-në si një organizatë “të politizuar dhe të korruptuar”, që sipas saj ka në shënjestër Izraelin.
Nga ana tjetër, zëdhënësi i Guterres, Stephane Dujarric, deklaroi se “dera e Sekretarit të Përgjithshëm mbetet e hapur”, pavarësisht deklaratave të Izraelit.
Raporti vjetor i OKB-së për dhunën seksuale në konfliktet e armatosura pritet të publikohet së shpejti. Vitin e kaluar, organizata kishte paralajmëruar se Izraeli mund të shtohej në listën e vendeve apo palëve të dyshuara për përdorim të dhunës seksuale gjatë luftës.
Raportuesja speciale e OKB-së për dhunën ndaj grave dhe vajzave, Reem Alsalem, tha se përfshirja e Izraelit në listë është “shumë e vonuar”, duke pretenduar se ekzistojnë prova të dokumentuara për abuzime sistematike ndaj palestinezëve në burgjet dhe qendrat izraelite të ndalimit.
Izraeli i ka mohuar vazhdimisht këto akuza, ndërsa marrëdhëniet mes Tel Avivit dhe OKB-së janë përkeqësuar ndjeshëm që prej nisjes së luftës në Gaza në tetor të vitit 2023.
