Kujt i thotë “Të dua pafundësisht”, Luana Vjollca?

Një parashikuese e motit si Luana Vjollca, zgjedh të parashikojë për veten vetëm ditë me diell, se kështu do të mund të tërheqë më të mirën për veten e saj. Është energjike dhe pranon lulet, si dhurata me e bukur që çdo femër të ndihet paksa mbretëreshë në këtë botë konsumi. Duke i pranuar, edhe nëse dërguesi është i panjohur solli kështu lulet në modë, si gjesti më i bukur dhe romantik që një djalë duhet t’i bëjë vajzës që pëlqen shumë. Për të është mëkat t’u thuash jo suprizave të bukura, ndaj kështu nga një person misterioz, i cili e nisi lojën e luleve në fillim me buqetat tek dera e shtëpisë, tani janë bërë shumë të tillë, disa prej të cilëve madje e presin tek hyrja e “Top Channel”. Nuk mbyllet me kaq kjo aventurë, pasi qindra e mijëra djem të tjerë i shkruajnë në profilet e saj në rrjetet sociale, ku e komplimentojnë dhe i këkojnë ta takojnë… Në çdo rast Luana ndihet e mrekulluar, pasi suprizat i pëlqejnë.

E sapokthyer nga një koncert në Zvicër, ajo rrëfehet në këtë sezon të nxehtë për revistën “Story”, se si po e kthen këngën në profesion. Për çfarë ndihet me fat, si e injoron energjinë negative të inatçinjve dhe xhelozeve, çfarë ka për të thënë në lidhje me komentet për ndërhyrjet në fytyrë, deri ku do të arrijë me ambiciet që ka në televizion dhe muzikë. Po marrëdhënia e saj me djemtë cila është, dhe me dashurinë si i ka punët? Zakonisht bota e meshkujve ndahet në tri pjesë përballë femrave të bukura si ajo; ata që e shohin çdo ditë drejtpërsëdrejti, ata që e shohin në ekranin e televizorit si një femër të paarritshme, dhe ata që pavarësisht se i takon apo punon me ta, ajo s’ua var. Por si duhet të jetë një mashkull që të marrë vëmendjen e Luanës, dhe sa e plotësuar ndihet në jetën e saj, na i thotë vetë në këtë rrëfim ekskluziv, të realizuara enkas për “Story-n”:

Sa të shohim ty Luana na kujtohen lulet. Si përfundim do të na thuash se kush është dërguesi misterioz i buqetave që kanë pushtuar rrjetet sociale?

Gjejeni ju pra! (qesh)

Ok, por është folur se nuk është një i vetëm, pasi tashmë janë disa persona, të cilët shpenzojnë para për lulet e mrekullueshme…

E kam thënë shumë herë në fakt, edhe ndonjëherë me vjen habi se si kjo histori është kaq e bukur, dhe ka zënë kaq shumë vend aq sa mua më duhet të flas për këtë në çdo intervistë timen. Tashmë është kthyer në ritual për mua. Janë të shumtë ata që më dërgojnë lule. Ka nga ata që më presin jashtë punës dhe m’i japin vetë, dhe di të them vetëm që ndihem e bekuar!

Një djalë nga Kosova pohoi se ishte ai dërguesi. Ç’mund të thuash për të?

Kam pafund mesazhe në profilin tim në Instagramin, njësoj si ai djali i cili e dërgoi në formë shakaje, ashtu siç bëjnë të gjithë. Dhe unë për t’i respektuar sadopak, mundohem t’ua kthej me mesazh. Kur kjo keqinterpretohet e keqpërdoret të vjen keq, sepse bëhen lajme pa baza dhe pa sens më pas. Por përderisa s’është cënuese për jetën time, kjo gjë s’më pengon.

Ke shumë ndjekës në rrjetet sociale. Çfarë mendon se të bën kaq të pëlqyer në sytë e tyre?

S’di të them ç’me bën të pëlqyer ose më mirë s’më takon mua ta them. Por di dhe dua ta them se kjo është kënaqësia më e madhe, që mund të marrë një njeri në këtë profesion që unë kam, pra bota e televizionit. Unë punoj për ata, jam këtu falë tyre! Janë një inspirim e forcë e madhe për mua e për të mos u ndalur.                                                                       Sa mesazhe të vijnë mesatarisht në inbox çdo ditë, dhe s’i arrin t’u përgjigjesh të gjithëve?

Ju thashë se jam njëri që lumturohem shumë nga detaje të vogla. E ato mesazhe, e ato fjalë për mua janë gjithçka që mund të kem me atë pjesë të njerëzve, të cilët s’mund t’i takoj. Ndaj mundohem që me aq sa mundem t’u kthej përgjigje. Ata këtë e vlerësojnë e kjo është një pjesë lumturie për mua.

Mund të jesh ndër të paktat vajza që merr lule në ditët e sotme. Cila është dhurata që e dëshiron shumë, por që ende s’ta kanë bërë?

Unë i dua surprizat, jo dhuratat. E si të tilla s’mund të cilësoj çfarë dua të më bëjnë. Qoftë kjo dhe diçka shumë e vogël, por që s’e pres është shumë për mua.

Muzika është kthyer tashmë ndër prioritetet e tua. Je duket punuar për ndonjë klip të ri dhe si do të shfaqesh kësaj here?

Jam duke punuar fort me shumë materiale të reja. Fatkeqësisht jemi ende herët që të paralajmëroj diçka konkrete, por të paktën një material veror do të jetë shumë shpejt në treg.

Ku do të shohim tjetër këtë verë?

Siç e thashë më sipër po punoj fort me shumë projekte për këtë verë. Kam shumë plane, të cilat s’di sa prej tyre do mundem të realizoj. Por edhe këtë vit do të jem e angazhur me “Summer fest”, do të shëtisim në disa qytete të vendit, dhe do të takoj njerëz nga gjithë trojet shqiptare. Dhe për këtë mezi po pres!

Meqë jemi në fushatë politike, ke marrë ndonjë ofertë për t’u bërë pjesë për shkak të popullaritetit që ke? Si u je përgjigjur?

Do të zgjidhja përherë të mos kisha dalje të tilla të bindjeve të mia politike, për t’I bërë ato publike.

Të jesh gjithë kohës në qendër të vëmendjes, është e thjeshtë apo e vështirë për t’u menaxhuar?

Pyetje e vështirë. Është bukur, por jetojmë në një vend të vogël si Shqipëria, ndaj duhet të privohesh nga shumë gjëra.

Do të thuash që nuk e jeton jetën në maksimum, pra je e privuar për shkak të famës?

Në fillim para shumë vitesh më dukej privim ndalimi ose mosbërja e shumë aktiviteteve, që moshateret e mia mund t’i bënin. Më vinte keq pse qenka ky kushti që duhej të paguajmë si personazhe televizivë. Tani jo më, pasi jeta ime ka marrë tjetër vrull.

Cila është e përditshmja dhe argëtimet e tua?

Një pjesë të madhe të kohës e kaloj në “Top Channel”, në punën time. Pjesa tjetër ndahet në studio, sidomos këto kohë pasi është kohë me frytdhënëse dhe më e ngarkuar po ashtu. Ndaj pjesa e kohës së lirë i takon shtëpisë, familjes sime, udhëtimeve.

Deri tani të njohim në tre profile si personazh ekrani. Atë të vajzës me veshje serioze në prezantimin e motit, çapkënes në “Pa limit”, dhe sensuales në klipet e tua. Kush është Luana e vërtetë?

Pikërisht kjo! Me shumë dashuri për të bërë gjithçka në mënyrën e duhur, e për t’iu përshtatur asaj që i vendos vetes detyrë për të realizuar.

Je e pasur sa për të shijuar hobet që ke?

Jam e bekuar që kam pasur mundësi të realizoj me punë çfarë kam dashur. Pasuri është të të duan, të realizosh pasionin tënd e ata të të mbështesin në çdo hap. Paraja për mua vlen zero para kësaj.

Si duhet të jetë një mashkull që të marrë vëmendjen tënde?

S’do guxoja të përmendja karakteristika se si duhet të jetë një mashkull të paktën fizikisht jo e jo. Kjo pasi për mua njeriun e bën tjetër gjë. Për shembull mua më pëlqejne detajet. Ndoshta do më tërhiqte vemendjen dikush thjesht nëpërmjet tyre.

Dashuria për ty çfarë është?

Bekim.

Je ndier ndonjëherë e refuzuar në jetë?

Mos ma uro!

Një partner i bezdisshëm cili do të ishte për ty?

Posesivi.

Ti e imagjinon burrin e jetës të bukur apo të zakonshëm dhe të dashur?

S’e imagjinoj.

Tradhtia për ty si fjalë çfarë ndjesie të shkakton?

Neveri.

Kush është personi i fundit që të ka thënë; “Luana je shumë e bukur!”

Emra doni?

Po ai që të ka bërë të vuash?

Prapë emra doni? (qesh)

Kujt i thua “Të dua pafundësisht!”

Mamit.

Gjesti i të kafshuarit të buzës, çfarë kuptimi ka për ty?

Asnjë. Më është bërë pak ves, thjesht kaq.

Ke gjetur ngjashmëri të bukurisë tënde me atë të një personazhi të njohur botëror? Cila është ajo?

Jo, dhe më vjen mirë në fakt. Nëpër foto të ndryshme ka nga ata që mund të më krahasojnë me disa personazhe të huaj, por më pëlqen që nuk identifikohem me askënd pasi ky zakon tek ne qëndron dhe rëndomtë e kthejmë në një fare copy. S’do e doja këtë. Uni, të jesh unike, të jesh ti pa dashur të bëhesh, të ngjash apo të jesh si dikush tjetër ështe më e bukur se gjithçka.

Në tetë vite punë në televizion, çfarë ndryshimesh kanë ndodhur brenda teje, përsa i përket pamjes dhe tipit?

Kam qenë 15 vjeç kur jam zgjedhur pjesë e stafit të “Top Channel”, dhe 16 vjeç isha kur startoi emisioni. Sot jam 23 vjeç dhe janë pikërisht vitet kur njeriu zhvillohet, kështu që sa i përket pamjes besoj shumë, aq sa më akuzojnë dhe për ndërhyrje estetike, por absolutisht s’kam asnjë të tillë. Ndërsa sa i përket pjesës tjetër absolutisht që janë vite pune që të rrisin e që të bëjnë të pavarur.Krijon profilin dhe unin tënd. Sot ndryshe nga atëherë ndihem e përgatitur për të realizuar me shumë punë e vullnet gjithçka që dua.

Nëse do flitej për ndërhyrje plastike, nga cila pjesë e trupit do e kishe nisur?

Besoj se po të kisha dashur t’ia nisja do e bëja. Deri më tani unë jam e lumtur me çfarë kam dhe me defektet e mia. Falenderoj Zotin!

Je 23 vjeç, mendon se ke eksperiencën dhe pavarësinë e duhur për të jetuar e vetme në shtëpi?

Jo për këtë s’jam në fakt aspak e përgatitur. Pa mamin edhe 43 të jem s’bëj dot!

Kush të këshillon për zgjedhjen e një fabule për këngë?

Unë përhere dua që fabula të ketë një pjesë timen, që në këtë mënyrë kënga të më përfshijë. Por veç vetes janë motrat dhe mami ato që e dëgjojnë të parat, dhe absolutisht jane këshillueset e mia më të mira.

Je penduar për ndonjë vendim që ke marrë në jetë?

Po.

Ke vuajtur nga diçka në karrierën tënde?

“Vuajtur” është fjalë e madhe. Kam pasur absolutisht dobësitë e mia, por nëse nuk “rrëzohesh” atëherë as nuk çohesh dot. Kjo më ka ndihmuar.

Mund të na tregosh se skllave e çfarë pasioni ti je?

E ushqimit nëse quhet.

Deri ku shkojnë ambiciet e tua?

Deri aty ku më plotësojnë mua e nuk cënojnë askënd.

E ndien xhelozinë femërore, dhe si sillesh kur e kupton një gjë të tillë?

Me vjen keq që po priremi shumë ndaj kësaj dukurie. Ndihet shumë, ndihet kudo. Shpesh pyes “pse?”. Pyetje naive por shpesh s’e kuptoj për çfarë vlen të xhelozojmë, të bëjmë keq, të jemi negativë, kur jemi vend kaq i vogël dhe me një mllef të madh për njeri-tjetrin. Femrat sidomos duhet ta mbështesin njëra-tjetrën.

Jeta jote është përrallë apo një përpjekje vazhdueshme?

Përrallë nga ato që përjetohen në realitet, në përpjekje që ajo “The end” të lërë gjurmë.

Intervistë marrë nga Story