Shtëpia e Bardhë ka publikuar një raport mjekësor që përshkruan gjendjen shëndetësore të Presidentit amerikan Donald Trump, duke theksuar se ai vazhdon të ketë një “shëndet të shkëlqyer”, pavarësisht se po përballet me ënjtje në pjesën e poshtme të këmbëve dhe mavijosje të lehta në duar.

Sipas memorandumit të hartuar nga mjeku i presidentit, Dr. Sean Barbabella, bazuar në rezultatet e një kontrolli të fundit mjekësor, Trump “mbetet në shëndet të shkëlqyer, duke shfaqur funksion të fortë kardiak, pulmonar, neurologjik dhe fizik në përgjithësi”.

Dokumenti, i datës së martë (26 maj) dhe i publikuar të premten në mbrëmje (29 maj), thekson se presidenti është “plotësisht i aftë për të kryer të gjitha detyrat” e postit të tij.

Vizita e Trumpit në Qendrën Mjekësore Ushtarake Kombëtare Walter Reed ishte e treta në 13 muajt e fundit dhe e katërta gjatë mandatit të tij të dytë presidencial.

Kontrollet e tij shëndetësore kanë tërhequr vëmendje të veçantë gjatë vitit të fundit, pasi fotografi të ndryshme kanë treguar herë pas here kyçe të fryra, mavijosje në duar dhe njolla në qafë.

Trump, i cili më 14 qershor mbush 80 vjeç, është personi më i moshuar i zgjedhur ndonjëherë president i Shteteve të Bashkuara.

Pas vizitës së së martës, Trump deklaroi se “gjithçka rezultoi në rregull”.

Sipas raportit, presidenti paraqet “ënjtje të lehtë në pjesën e poshtme të këmbëve”, me përmirësim krahasuar me vitin e kaluar. Gjithashtu, ai vazhdon të ketë mavijosje në duar, të cilat mjeku i përshkruan si të zakonshme, beninje dhe të lidhura me irritimin e lehtë të indeve të buta si pasojë e shtrëngimeve të shpeshta të duarve, në kombinim me përdorimin e aspirinës për parandalimin e problemeve kardiovaskulare.

Raporti nuk jep detaje mbi trajtimin e lëkurës në qafë që Trump iu nënshtrua në mars dhe nuk përmend nëse ai ka kryer një tjetër rezonancë magnetike (MRI), siç ndodhi në tetor.

Dr. Barbabella thekson se funksioni i përgjithshëm i zemrës është normal dhe se ekzaminimi neurologjik ka treguar gjendje normale mendore, përfshirë testimet për depresion dhe ankth.

Sipas raportit, Trump është 190 centimetra i gjatë dhe peshon 108 kilogramë.

Dokumenti shton se presidenti ka marrë këshilla parandaluese, përfshirë rekomandime për dietën, përdorimin e aspirinës në doza të ulëta, rritjen e aktivitetit fizik dhe vazhdimin e humbjes së peshës.