Kryeministri izraelit, Benjamin Netanyahu, paralajmëroi të hënën se Izraeli do t’i përgjigjet me forcë çdo sulmi të ardhshëm nga Irani, pas tensioneve të fundit mes dy vendeve. Në një mesazh video, Netanyahu tha se Irani dhe Hezbollahu kanë tentuar të krijojnë një “realitet të ri” përmes sulmeve kundër Izraelit, por theksoi se një gjë e tillë nuk do të tolerohet.
Sipas tij, Izraeli ka vendosur presion të konsiderueshëm mbi Iranin dhe Hezbollahun dhe është i gatshëm të reagojë edhe më ashpër nëse përballet me sulme të reja. Netanyahu nënvizoi se Izraeli nuk do të lejojë që kërcënimet nga Libani apo Irani të mbeten pa përgjigje.
Deklaratat e tij vijnë në një moment tensioni të lartë rajonal, pasi Izraeli kreu të dielën një sulm ajror në Bejrut, duke pretenduar se kishte në shënjestër një qendër komande të Hezbollahut. Ndërkohë, mediat izraelite raportuan se Netanyahu kishte rënë dakord me një kërkesë të presidentit amerikan, Donald Trump, për të ndaluar sulmet ndaj Iranit, ndërsa operacionet ushtarake në Liban do të vazhdonin.
