Kryetari i Partisë Demokratike, Sali Berisha u pyet në konferencë edhe për përplasjen e djeshme të kryeministrit Edi Rama dhe ish ministres së Jashtme, Elisa Spiropali pas qëndrimeve publike të kësaj të fundit dhe mospjesëmarrjen në seancën për imunitetin e Belinda Ballukut.
Sipas kryedemokratit, PS është kthyer në një parti krimi, dhe se së bashku me kabinetin qeveritar janë “lubizuar” në mbrojtje të ish zv kryeministres Balluku, e akuzuar nga SPAK për abuzime me tenderat.
“Ajo parti sot është më shumë se kurrë parti krimi, ajo parti sot është parti mburojë e krimeve monstruoze ndaj shqiptareve dhe plaçkitjeve që Rama, organizata e tij kriminale i bëjnë fondeve dhe pasurisë publike.
Partia dhe qeveria janë lubizuar përfundimisht, janë grahmat e fundit të një regjimi që bëjnë gjithçka për t’u mbajtur në këmbë, por që shqiptarët kanë vendosur ta hedhin poshtë.”, tha Berisha.
Kujtojmë që debati i fundit mes Ramës dhe Spiropalit u shënua ditën e djeshme gjatë mbledhjes së Grupit Parlamentar pas akuzave të ngritura nga ish ministrja kundër qeverisë dhe Partisë Socialiste.
Rama i ka vënë ultimatum Spiropalit, duke e paralajmëruar se duhet të zgjedhë ose të jetë më PS-në ose kundër saj. Kryeministri i ka kërkuar asaj që të ndalë postimet në rrjetet sociale kundër PS-së në të kundërt do e gjeje vetën e përjashtuar nga Grupi Parlamentar.
“O me ne, o përballë nesh, merr frymë thellë dhe kupto atë që ke bërë”, mësohet të jetë shprehur Rama gjatë mbledhjes pa media.
